Northern Army Commander Lieutenant General Upendra Dwivedi chuan thenawm ram atanga ramri kâna India-a mi firfiak luh ruk tum chu an tlahniam zel tih a sawi a, hetih rual hian tunah hian Jammu & Kashmir ramri hrulah luh dan dapin mi firfiak 200 vel an awm reng tih a sawi.
February, 2021 atanga Indo-Pak ramria inkahhai puan chuan rah tha tak a chhuah niin Zirtawpni khan a sawi.
Training chhuak thlap mi firfiakte chu Jammu & Kashmir-ah an tlem telh telh niin a sawi a, kumin bikah ram dang mi firfiak 21 thah an ni tawh tih a sawi a, hei hi tual chhung miten awmna tur leh thlawpna an lo pek duh loh avanga that thei an ni tih a sawi.
“Indo-Pak ramri-ah mi firfiak 200 vel an la awm a. LoC kâna India-a chet tum an ni,” tiin Dwivedi hian Jammu & Kashmir hrul leh Line of Control (LoC)-a venhimna dinhmun zawhna a chhang.
Mi firfiakten ramri an kân tur lo danchahnaah hian an che tha hle niin a sawi bawk.
“Reserve sipaite chu ramri ven chhawng hnihnaah dah niin ramri kân ru an awm lo,” a ti.
“Thla 12 liam ta chhung khan inkahhai puan bawhchhiatna pawh a tlem hle a, vawi hnih thum vel chiah a awm,” a ti.
Ramri chhehvelah hian helho inkulhna pawh dap mek zel a ni tih a sawi a. “Terrorist camp hi paruk vel leh a tenau 29 a awm a. Sipai inchhawpna hnaih tak takah tawmna phuahchawp a awm nual bawk,” a ti.
Ramria mi firfiakte awmhmun an khuar thei chu Pakistan army mawh niin a sawi a, “Pakistan army leh an agency-te hian hei hi an pha thei lo vang,” a ti.
Pakistan atanga India-a luh ruk hi tlangram leh ramhnuai atang mai ni lo, Jammu-a International Border bakah Punjab leh Nepal atang pawhin an ti thei niin a sawi.
“Kan tum ber chu ramri kân ru thinte hi man chhuaha a rang thei ang bera dah that a ni,” a ti.
Army commander hian ramri leh a chhehvelah hian ram dang mi firfiakte bakah tual chhung mi firfiak mi 40 atanga 50 vel an awm reng tih a sawi bawk a, an zat tak erawh hriat a har niin a sawi.
“Tun thlengin ram dang mi 21 kan that tawh a, hei hian tual chhung miten ram dang mi firfiakte lo hum duhna an neih kha ni tin a tlahniam zel tih a lantir a ni,” a ti.
Dwivedi chuan tual chhung mi ni si, mi firfiak ni bawk an thahte chu inzirna nei tha lo tak tak, hmanrua pawh pistol deuh chauh nei an ni hlawm niin a sawi.
Chi leh hnam, sakhaw bil zawnga kal chu thil ngaimawhawm tak nia a hriat thu Dwivedi chuan a sawi a. Tleirawl zingah hel zawm an pung a, hei hi intih bikna vang nia hriat a nih thu a sawi.
“A bil zawnga thil kalpui turin an inzir a, Pakistan lamin an lo pawt bawk si a. Article 370 hlih hnuah erawh hei hi a ziaawm tawh,” a ti.
“Sipaite hi hemi lamah hian a hmalatu pawimawh tak a ni,” tiin Dwivedi chuan a sawi a. Sikul 48-ah zirlai 15,000 chuang chu zirtir niin an hma hun leh ram tana an tangkai theihna tur zirtir an nih thu a sawi.
Jammu & Kashmir-a Armed Forces Special Powers Act (AFSPA) hman mek hlih chungchang chu ni telin kawngpui dunga sipai leh paramilitary force duty ngai pawh a tlem tawh niin a sawi.
Amarnath Yatra chungchangah pawh Operation Shiva hmangin intihthianghlimna leh SOP zam a nih thu a sawi.
Kuminah hian biakzin pawh kum 2019 let an nih a ring a. “Yatra laiin mi firfiak chetna a awm lo va, sipai pawh dah belh a ni ang,” a ti.
Hizbul firfiak dam rei ber that
Jammu & Kashmir-a Anantnag district-ah Thawhtanni khan mi firfiak pathum kah hlum an ni a, an zinga pakhat hi Hizbul Mujahideen firfiak zinga dam rei ber pakhat a ni.
Police chuan Amarnath Yatra kawng pawimawh, Pahalgam-a inkahnaah hian hlawhtlinna tha tak an chang tih a sawi.
An kah hlum zinga pakhat hi Hizbul Mujahideen mi firfiak dam rei ber niin an sawi a. “Ashraf Molvi leh mi firfiak dang pahnih thah an ni a. Yatra kalkawnga hlawhtlinna lian tak kan chang a ni,” tiin Inspector General of Police Vijay Kumar chuan Twitter-ah a tar lang.
Pahalgam-a ramngawah mi firfiak tawm an awm tih an hriat bawhzuiin venhim hna thawktute hi an thawk chhuak a. An lo kah hmasak zawk hnuah kah let niin inbeihna hi a thleng zui niin police officer hian a sawi.
Kashmir chhim lama khualzinte tlawh nasat tak, Pahalgam hi Amarnath Yatra-a base camp pakhat a ni a, yatra hi kum hnih awl a nih hnuah June 30 hian tan tur a ni.