Kum thum kalta chhunga Apple laka premium smartphone bika ‘ber’ nihna a hloh hnu ah Samsung India chuan iPhone siamtu hi a lehthal ta a, Galaxy S22 series hmangin hnehna a chang.
Kumin first quarter (January – March) khan Samsung hian market share 22% a changpha a, market share hlutna 27% nen a invawrh chhuak niin, Counterpoint Research-in a tarlang.
Samsung hi march thla bik khan Galaxy 22 Ultra a chetthatpui hle a, Galaxy S 22 series te nen hian market share 38% an hauh phak laiin, Apple hian 30% a chang ve bawk.
Hemi thla vek hian smartphone market pumpui angah market share volume 22% leh market share 27% nen a dingchhuak chiang hle.
Samsung hi 2019 thleng khan premium smartphone segment bikah market leader a ni reng thin a, Apple meuh pawhin a pha ngai lo.
Amaherawhchu, Apple hian 2020 atang khan smartphone game a rawn thlak danglam ta a, model tha tak tak- iPhone 11, 12 leh 13 hmang te’n Samsung-in ‘ber’ nihna a lo hauh tawhna zawng zawng a chhuhsak fai ta vek mai a ni.
Dinhmun dik tak
Kum 2021 khan Apple hian ramchhung market-a premium segment bikah maktaduai 5.4 zet a hralh chhuak thei a, Samsung erawh chuan maktaduai 1.1 a hralh thung.
Premium segment bika Samsung-in top position a hloh chhanah hian a hlawhtlinpui em em thin Note series a kalpui tawh lo kha a ni a, aiawh thlaktu tur tha tak a vawrhchhuak mai bawk si lo nen.. hei hi remchangah la in, Apple a invawrh chho ta a ni.
Tunah erawh he hmunruak zau tak hi Galaxy S22 series hmangin a rawn luahlum tha leh ta a, March thlaa liam taa chetha em em Samsung hian ‘ber’ a nih leh theihna hi a vawng chhunzawm zel dawn em, tih chu hunin a rawn hril ang.