Aizawl: Aizawl District Disaster Management Authority (ADDMA)-in May thla chhungin Aizawl khawpui chhunga veng hrang hranga Local Level Disaster Management Committee (LLDMC) tan chhiatrupna/khuarel chhiatna a thlen palh a chet lak dan chungchang training buatsaih turin hma an lak meknaah nimin khan Aizawl DC Dr. Lalhriatzuali Ralte, Chairman ADDMA ni bawk chuan Chanmari YMA Hall-a Zone I – VIII chhunga veng hrang hranga LLDMC te tan training buatsaih a hmanpui.
Dr. Lalhriatzuali Ralte chuan ADDMA hmalakna leh hmachhawpte sawiin khuarel chhiatna a thlen palha mawhphurtuten rang taka chet an lak dan tur ruahmanna, Incident Response System (IRS) chu Aizawl district tan din a nih tawh thu a tar lang a. Hripui a len hmain school safety program kaltlangin Aizawl khawpuia school 50 a zirtirtute zirtirna pek an nih bakah school hrangah awareness programme leh evacuation drill neih a nih thu pawh a sawi lang.
Aizawl DC chuan khuarel chhiatna a lo thlenin a tuartute hnenah DDMA-in SDRF kaltlangin tanpuina awm ang angte an pek dan pawh sawiin Aizawl district huam chhunga Covid-19 vanga boral chhungte hnenah ex-gratia tanpuina mi 349 hnenah pek a nih tawh thu leh fund dawn leh hunah tuna dilna dawn sa mi 27 hnenah pek leh a nih tur thu pawh a tar lang a .CSR atanga fund hmuh atanga sak Makeshift CCC pawh sak zawh ni tawhin, Health & Family Welfare Department kuta hlan turin ruahmanna siam mek a ni, a ti a. Veng hrang hranga tlawmngai pawl, a bikin Local Level Task Force (LLTF) te hnena hripui dona kawnga Sorkar an thawhpui dan leh an hmalaknaah lawmthu a sawi bawk a ni.
Training-ah hian mi thiamten zirtirna pein zawhna leh chhanna hun hman a ni a. Vawiinah a hmun ngaiah Zone IX – XIV chhunga LLDMC-te tan buatsaih a ni leh dawn.
Hemi kaihhnawihah May 5 khan ADDMA chuan Aizawl SP Conference-ah zonal officer-te tan training ‘Training of Trainers (Zonal Officers)’ a buatsaih a. May 17 leh 20 inkarah tui tlate rang taka zawnchhuah leh chhanchhuah chungchanga zirtirna hmun hnihah an buatsaih dawn a. May 23 leh 27 inkar hian 5th IR Battalion Lungverhah building chimin a delhte zawn chhuah leh chhanchhuah chungchang training neih a dawn bawk.