Thutak Nunpuitu Team in hnehna nen bul an tan a. Chhinga Veng Spikers chu 3-1 a hnehin Zothan Autoworks Pro Volleyball League-ah an chak.
Thawhtanni zana inkhelah champion lai Chhinga Veng Spikers in set la hmasa zawk mahse tha takin TNT an tho leh a, set thum an la zawn.
TNT ‘comeback’ dan theih loh
R Dengṭhuama Indoor Stadium, Mualpuiah TNT-in tha takin championship bul an tan a, set khatnaah insiam rem hman lo mahse Vanlaltanchhana (Buanga) leh Laldinchhunga’n team fuih phurin 22-25, 25-15, 25-23, 25-16-in an chak.
Kum li chuang hnua TNT-in Pro Volleyball-a hnehna an chan hmasak ber a ni a. Kum 2018 April 18 khan eague inkhelah 31-29, 19-25, 25-14, 18-25, 15-10 – in Tuichangral lakah an chak a, hemi hnu hian Spikers an hneh hma zawng khelh riat an tlawm zawn hman.
Champion lai Chhinga Veng hmabak a hautak zui ve thung a, league tanna inkhel hmasa berah 2019 final-a an hneh tawh Durtlang North-in set thum set hnihin an hneh tawh. Khelh hnih an tlawm zawnna niin semifinal lut thei turin khelh hnih an la neihah danglamna an thlentir a ngai.
Team panga inel zinga Mizo hlanga khel awm chhun TNT tan Buanga’n Pro Volleyball a khelh hmasak berah point 21 hmuin 11 a hloh a, D3 Business Player of the Night lawmman a dawng nghal.
Coach thar Lalhmangaihsanga Sailo hovin Muanna Veng club-in inpumkhat leh phurna sang tak nen team thar an lantir. An zuang taimain net bulah lehlam vuak an dang tha hle a, inchhawk phurin nung takin an khel tluan.
Dinchhunga’n vawi 14 vaw tlain tum ruk a tisual a, Kawnpui tlangval Buanga nen mittlung takin an khel. Chhinga Veng tan Sujith Acharya chuan point 31 hmu mah se 21 a hloh a, Durtlang North nen an inkhelh tum ang bawkin team a chawi kang zo lo.
Buanga leh Dinchhunga bakah Muanna Veng team tan Sadraka Fanai chuan point 11 hmuin point thum a hloh a, Zosangzuala’n point riat thawk chhuakin tum khat chiah a tisual a, Chhantluanga’n point hloh nei lovin vawi nga a hlap tla a, awmze neiin an khel.
Durtlang North an hneh loh tum aiin Chhinga Veng player-te an tlahniam a, Lianmawia’n point 11 hmuin tum ruk a tisual a, Ramenga’n vawi riat hlap tla mah se point li a hloh bakah Nunpuia’n point nga a hmuh zat chiah a paih bawk.
El thama an inlan hnuah TNT-in Hunthar laka tlawm tawh Tuichangral hmachhawnin Ningani zanah an khel leh dawn a, chak mamawh Spikers-in kar leh Thawhtanni zanah Hunthar an bitum ang.
Hmeichhe lamah Kanan an chak nghal
Thawhlehni-ah Zothan Autoworks Pro Volleyball League hmeichhe lamah inkhel pahnih a awm a. Tlar dar 3 a inkhel hmasa zawkah Kanan in duhthusam a bul tanin champion lai Durtlang chu 3-0 in an hneh.
R Dengṭhuama Indoor Stadium, Mualpuiah Kanan tan Mizo zinga India senior team tana koh tawh awm chhun Vardingliani’n langsar takin a khel a, 25-21, 28-26, 25-14-in an chak.
Mizo player zinga tawnhriat nei tha tak Dingdingi’n point 25 thawk chhuakin vawi ruk a tisual a, D3 Business Player of the Match lawmman dawngin fa nei tawh mahse mi malin a la filawr hle.
Kum 2019 a champion Durtlang in tum dang an pha lova. Inkhel tan tir atangin a bet zawkah an tang nghal.
Set hmasa ber an hloh a, tho chhuak leh tur an awm lo. An khelh chhungin Lalramliani’n point 12 hmuin point nga a hloh a, captain Lalawmkimi Khenglawt chuan point sarih thawk chhuak bawkin set hnihna la thei turin 26-25-in an sang hman.
Mahse L Sangzuali’n vaw tlain lehlamin an nih rual hnuah Awmkimi’n a vaw kai lo va, B Tlangmawiin hlap tla ve lehin Kananin boruak sang leh harsa an pal tlang.
Kanan tan Dingdingi bakah Tlangmawii’n point kua hmuin tum riat a tisual a, Sangzuali’n point sarih hlawhin point nga a paih bakah C Lalnunpuii’n point ruk thawk chhuakin tum nga a tisual.
Kanan in Zirtawpni tlaiah Bethlehem Vengthlang an khelhpui leh dawn a, hemi zanah hian Durtlangin 2019 final-a an hneh Bungkawn an hmachhawn ang.