Aizawl: Human Resource Development Board Vice Chairman L. Thangmawia’n, “Technology hi Mizote chemkalna lam tak a ni a, technology thar piantir theihna tur tam tak kan velah a awm,” a ti.
Directorate of Science & Technology huaihawta National Technology Day nimina hmannaah he thu hi L Thangmawia chuan a sawi a. “Pi leh pute hunlaiin an mamawh mil technology an siam chhuak thei a, tunah pawh Zopa technology tangkai tak tak – arhmul pawhna, changel channa, kuhva rah thelna, vaimim fang nuaina, buh denna, nimbu tui sawrna, agarbati stick siamna leh a dangte Zopa scientist-ten an siam chhuak thei hi an chhuanawm a ni,” a ti.
L Thangmawia chuan Mizoram mil Zopa technology tihchangtlun zelna turin Innovation Facility Centre (IFC) hawn a nih thu sawiin, he centre atang hian Zoram mamawh technology thar piang chhuak tur tam tak a la awm zel dawn tih a sawi a. Technology hmasawnna atana theihtawp chhuah turin thangthar mi thiamte a sawm a. State Meteorological Centre khawl thar; mipuiin mobile phone atanga Aizawl khawchin an en theihna tur, Aizawl Automatic Weather Station a hawng nghal bawk.