Budgam district, Jammu & Kashmir-ah Ningani khan mi tum bik neiha beihna a thleng leh a. Kashmiri Pandit Rahul Bhat chu Chadoora khuaa Tehsildar pisaa a awm laiin kah hlum a ni.
Bhat hi na takin a inhliam a, damdawi inah hruai nghal ni mah se a thi tih puan zui a ni.
Police chuan pisa chhungah hian mi firfiak pahnih tlan lutin he pisaa hna thawk, Bhat chu hmun leh hmunah an kap niin an sawi.
Ningania thil thleng hi tun hnaia state dang mi leh tual chhunga sakhua leh hnam tlem zawkte beihna thleng tharlam ber niin tun hnai thla riat chhungin Kashmir-ah hetiang hi a tam hle.
Nikum October atang khan hetiang hi a tamin an beihte hi Jammu & Kashmir pawn atanga hna zawnga lutte leh ram leilung fa, Kashmiri pandit-te an ni tlangpui thin.
October khan ni nga chhungin civil mi pasarih, Kashmiri Pandit, Sikh leh state pawn mi Hindu pahnih telin thah an ni.
Hemi hnuah hian Kashmiri Pandit chenna, Sheikhpora khua chu a tam zawkin an chhuahsan zui.
Venhim hna thawktute pawhin beihpui thlak zuiin hetiang titu leh inlak hran tum pawlte an bei nghal.
Jammu & Kashmir-ah hian kumin chhungin mi firfiak 168 thah ni tawhin heng zinga mi 75 chu tum bik renga beihnaa thah an ni tih thuneitute chuan an sawi.
Mi firfiak thah zinga 21 hi ram dang mi an ni nghe nghe.
Eptu, Congress chuan BJP kaihhruai sorkar laipui chu a mite venghim zo lovah an puh.