Finance secretary hlui, kum 62 mi, Rajiv Kumar chu chief election commissioner (CEC) thar a ni dawn tih Law Minister Kiren Rijiju chuan Ningani khan Twitter-ah a tar lang.
Kumar hian May 15-a chawl tawh tur, Sushil Chandra a thlak ang.
“Danpui Article 324, clause (2)-in thuneihna a pek angin president chuan Pu Rajiv Kumar chu May 15, 2022 a\anga Chief Election Commissioner ni turin a ruat a. Pu Rajiv Kumar-a duhsakna ka hlan,” tiin Rijiju hian a tar lang a ni.
CEC-te hi kum ruk chhung hun an nei thei a, kum 65 an nih thleng an thawk thei thung.
1984 batch Indian Administrative Service officer Kumar-a hian Election Commission of India (ECI) hi September, 2020 khan Election Commissioner Ashok Lavasa a chawlh avangin a zawm a. A hun chhung hi tluang taka a hmang thei a nih chuan 2024 Lok Sabha inthlanpui bakah Himachal Pradesh, Gujarat, Rajasthan, Chhattisgarh, Madhya Pradesh, Karnataka, Telangana, Tripura, Meghalaya, Mizoram leh Jammu and Kashmir (J&K) inthlante chu a kaihhruaina hnuaiah neih a ni ang.
Kum 2018 atanga thlan sorkar nei tawh lo, Jammu & Kashmir hi inthlang thei tawh tura dah a ni tawh a, inthlan lam an hawi mek.
Kumar-a hun chhung hian inthlan dan hmang siam that tur hmabak a awm nual a. Heng zingah hian voter-te inziah luh hun ni tam zawk siam te, Aadhaar number leh voter card thlun zawmte pawh tih tum a ni.
Kumar-a hi public policy-a master’s degree nei niin September, 2017 leh February, 2020 inkar finance secretary a lo ni tawh a, hna pawimawh dang tam tak a lo chelh tawh bawk.