Indian Army chuan ram chhunga siam ngei, ralthuam awmna lai hre thei (weapon locating radar) 12 lei belh a tum mek a, hei hi China nena inrina vel vilna tur a ni.
Ralthuam lei tum hi Swathi an ti a, km 50 biala hmelmaten mortar, laipui leh rocket hmanga an lo kahna lai hmu thei a ni a. Mi kaptu thilte awlsam taka lo hmu thei a ni.
Swathi radar an tihte hi Defence Research & Development Organisation-in an duan niin a siam hna hi Bharat Electronics Limited-in an thawk thung a, defence ministry-in a pawmpui chuan Rs. vaibelchhe 1,000 man vel tur a ni.
Indian Army chuan locating radar an tih hi Jammu & Kashmir-a Line of Control-ah chuan a lo hmang reng tawh a. Swathi system bik pawh hi kum 2018 khan army chuan trial an lo neihpui tawh bawk.
Defence ministry chuan ram venhimna lam hmanruate hi sorkar laipuiin mahni kea din, Atmanirbhar Bharat project a kalpui angin tual chhunga siam ngei a tam thei ang hman a duh a. Hei hian ram dang atanga lak luh thin a titlem a, ram danga innghah lutuk chu a chhawkin ralthuam tha siam lamah pawh hmasawnna a thlen bawk a ni.