Basketball Federartion of India leh Mizoram Basketball Association te tangkawp chuan Aizawl ah May 13 leh 14 hian India rama 3X3 basketball inelna sang ber anga ngaih BFI-INBL 3X3 Season-1 Tournament a buatsaih dawn.
Indian National Basketball League 3X3 hi India ram chhung khawpui hmun 20 ah khelh tur a ni a, heng zingah hian Aizawl chu khelhna hmun atan thlan zingah a tel.
Men & Women, Under 18 Men & Under 18 Women Category-ah then niin India rama team awm tupawh mahni duhna ber khawpuiah khelh theih tura ruahman a ni a. Huang tin a champion 20 ten National Finals May 27-29 chhungin Bengaluru-ah an khel leh ang.
5X5 basketball bakah 3X3 basketball hi Olympic inelna pakhat zingah telh a ni tawh a,he INBL 3X3 tournament hi Paris 2024 Olympics atana inbuatsaihna pakhat a ni.
BFI-INBL 3X3 hi Federation Internationale de Basketball 3X3 Event Registration nen inthlunzawm vekin tuna player tel zawng zawngte hi FIBA 3X3 World Ranking pek an ni nghal vek dawn bawk.
Season-1 ah hian Aizawl khawpuiah Men’s Category-ah team 32 leh Under 18 Men’s Category-ah team 17 ten inelna an hmachhawn dawn a, Hawla Indoor Basketball Stadium Republic Vengthlangah mipui a duh apiang en theih turin khelh a ni ang.