Ex-Mizo National Army Association (Ex-MNA) chuan Aizawl khawpui hmun lailia awm Assam Rifles chu Zokhawsanga an insawnna tur peih fel vek a ni tawh chunga insawn duh loah an puh a, tuna an awmna hmun an chhuahsan vat theih nan nawr zel an tum.
Ex-MNA hruaitute chuan nimin khan Aizawl Press Club-ah chanchinbumite an kawm a, sorkar laipuia Ministry of Home Affairs chuan Assam Rifles chu May 31, 2019 hmaa Zokhawsanga insawn turin a lo hriattir tawh tih sawiin, May thla a ral hnuah pawh an la insawn loh avangin March 31, 2020 hmaa insawn turin hriattir nawn ni mah se an la insawn duh ta lo tih an sawi.
Tuna Aizawla awm mek, Assam Rifles insawnna tur, Zokhawsangah hian kawng tha tak siam zawh a ni tawh thu sawiin, “An chenna tur leh an mamawh tul dang pawh peih fel vek a ni tawh chungin vawiin thlengin Assam Rifles battalion headquarters leh unit thenkhat-in Aizawl khawpui lailia an awmna hmun an la chhuahsan duh lo,” an ti.
MHA in Zokhawsanga in sawn tura tum hnih lai hriattirna a pek tawh hnu leh an awmna tur pawh tihfel vek a ni tawh chungah Assam Rifles battalion headquarters leh unit thenkhat an la insawn duh lo chu tha lo an tih thu sawiin, an chhuah hma chuan an nawr zel dawn tih an sawi.
Tun hnaia India president-in Mizoram a tlawh tum pawh khan hmaichhanah hmuin Aizawl atanga Assam Rifles insawn chhuah chungchang an sawipui tih sawiin, “An in sawn chhuah vat theih nana hmalak pui turin kan sawm a, President chuan hma a lo lak tur thu min hrilh, min dawngsawng tha hle,” an ti.
Assam Rifles-te Aizawl chhuahsan tura tih chungchang hi kum 1988 atanga intan a nih thu Ex-MNA hruaitute chuan an sawi a, “Kum 1988 April thlaa AR Ground Gate pawna civil mi leh Assam Rifles an intihbuaia Assam Rifles miten mi eng emaw zat an kah hlum tum khan khatihlaia chief minister, Pu Laldenga’n central sorkarah Aizawl khawpui laili atangin Assam Rifles chu sawn chhuak turin a ngen,” tiin an sawi.
Khatihlai khan Assam Rifles insawn chhuahna tur chu Mizoram sorkarin dap nghalin Zokhawsang a lo remchan hlauh thu sawiin, Zokhawsanga in hmun nei leh huan lo ram neite chu central sorkar atanga zangnadawmna pek an ni a, Assam Rifles awmna tura hmalak a nih thu an sawi.
Assam Rifles awmna tura Zokhawsang tihfel a nih khan Assam Rifles eng emaw zat chu an awmna turah hian an insawn tawh tih sawiin, hetihlai hian kum 20 hnuah pawh Assam Rifles battalion headquarters leh unit thenkhat erawh an la insawn duh lo va, Aizawlah an la awm lui ta reng tih an sawi bawk.