Aizawl : Mizoram khaw hrang hrangah Vaimim ei chhetu pangang chi khat Fall Army Worm a in lar chho leh mek a, Thingdawl Block Agriculture huam chhunga khua thenkhatah pawh pangang hi a puang leh mek.
Thingdawl Block Agriculture hotute chuan, Vaimim ei chhetu pangang awmna nia Loneitu te’n an rawn report ang zelin a theih chin chin enfiah a, pangang thahna hlo pawh pek zel a ni tih a sawi a; hetianga Vaimim ei chhetu pangang awmna te chu Department-ah lo neitute’n hriattir thuai zel turin a chah.
Fall Army Worm hi Kawnpui, Bualpui, Hortoki leh Khamrang-ah te a puang tih report an dawng tawh a; Kawnpui chu a nasat berna nia an hriat thu leh zau hrang hrangah pangang hian Vaimim a ei deuh vek tih an sawi a, kum danga Vaimim ei chhe tu an awm tih an hriat ngai lohna hmun/zau atang te pawhin report an dawng tih an sawi.
Thudawn dan chuan Fall Amy Worm hian Bilkhawthlir Block Agriculture huam chhunga Vaimim ching te pawh a tibuai tan ve mek niin Block Agriculture hotute chuan an sawi bawk a; tun dinhmunah chuan Saipum, Bilkhawthlir, Chemphai leh hmun thenkhat atangin Vaimim ei chhetu pangang te hi an che tan tih report an dawng tawh a ni.