Fai ngaina ila, fai turin i thawk tan nghal ang u
Mizoram sorkar in Fai inelna a buatsaih thin hi a tha khawp mai. UD&PA department in khaw fai inelna a buatsaihah kum 2021 chhunga khaw fai ber atan Biate khua thlan leh a ni a, an khaw hmalakna khi fak loh theih a ni lo bawk. Fai tura an beihna leh fai tuma an tanlaknate hi midang/khaw dang pawhin entawn chi a va ni em. Khaw fai ber an ni ngun ta viau mai bawk.
UD&PA dept hian category hrang hrang siamin, AMC huamchhunga ward hrang hrang bakah, district leh khaw lian zual (urban) thlengin fai inelna hi a semchhuak leh a, an hmalakna leh hmachhawpte hi sawi nep chi rual a ni lo bawk. Fai tura kan beih tlan zel hi a ngai reng bawk a ni.
Mizote hi fai ngaina ni chho ila, kan in leh a vel vangfai peih bawk ila, midang tihtura dah mai lovin keimahni hian thawk tan nghal mai zel bawk ila, incheina fai ve vur si, chetvelna bal ngai thei hi kan la tam mah mah emaw chu aw, a tih theih fo thin.
Fai tura beitute entawnin, thil tha tih chingtute chu entawn bawk ila, an tih dan zir chhawng zel chungin mitinin fai ngaina ila, tun aia fai lehzual turin i tang sauh sauh teh ang u. Sorkar pawhin ruahmanna leh rawtna tha zawk siam chho zel mawlh rawh se.