Aizawl: Nimin Pathianni zing dar 4:30 vel khan Mamit Dinthar kawna Assam Type in, mi pahnihin nepnawi dawr leh thingpui dawr atana an luah lai chu bungraw chuh hman lohvin a kang ral a. Kangmei chhuah chhan tak hriat ni lo mah se, a hmu hmasatute chuan thingpui dawr thuk lam atanga kang tan nia an hriat thu an sawi.
Cheng nuai 8 hu vel a kang ral nia chhut a nih thu Mamit Hmar Veng khawtlang hruaitute chuan an sawi a. Nepnawi dawra bungraw kang ral hlut zawng Rs. nuai 6 vel, thingpui dawr lama bungraw kang ral hlut zawng Rs. nuai 1 vel leh a in hlut zawng Rs. nuai 1 hu vela chhut a nih thu an sawi a ni.
Mamit Hmar Veng khawtlang hruaitute chuan kangmei chhuah thu Fire service lam an hriattir atanga minute 10 velah kangthelh pawlte an thlen thu an sawi a. Nimin la la khan kangmei sulhnu senghawi theih ang angte chu khawtlangin an senghawi nghal a. In kang ta neitu, Hortoki khaw mite pawhin nimin la la khan Mamit an pan nghal a, khawtlang hruaitute nen inbe rawn chungin hma an la zui nghal a. DM&R lamah report kimchang thehluh a ni ang a, branch YMA lamin an huam chhungah vehbur an khawnsak dawn niin thudawnna chuan a sawi bawk.