Liverpool tan trophy pali chawi turin beisei a la awm a. Inrinni zanah FA Cup chawi in tun season-ah trophy pahnihna an chawi.
Wembley Stadium a inkhelah Chelsea nen final an khel a, hun pangngai leh hun pekbelhah goal inpe lo mahse penalty shootout-ah 6-5 in an chak.
February thla khan Jurgen Klopp-a pawlte hian EFL Cup an chawi tawh a, hemi tum hian penalty-ah tho Chelsea hi an hneh.
Tun tumah final inkhelah Liverpool chu kheltha zawkah an tang hmasa a, Luis Diaz leh Andrew Robertson ten goal ban uiawm takin an tihper ve ve. Inelna an telna zawng zawnga final an thlen vek avangin Reds player-te an chau tawh tih a hriat a. First half-ah Mohamed Salah inhliam in second half tawp hnuah Virgil dan Dijk thlak a ngai.
Inkhel rei zelah Chelsea an kheltha tual tual a, mahse team tha Liverpool lakah football huaisen tak khelh an ngam lova. Bench atanga inkhel thlak danglam thei tur player an neih loh an tuar.
Marcos Alonso chuan goal ban tih perin Alisson-a’n a goal khung tur a dansak a tha hle bawk a. A tawpah erawh Blues hi a zawna FA Cup final vawi thum tlawm hmasa ber an ni.
Penalty hmanga chak zawk zawn a ngai ta a. Chelsea captain Cesar Azpilicueta chuan an penalty vawi hnihna petin goal ban a pet per.
Liverpool chakna ni turin an penalty hnuhnung ber chu Sadio Mane-a’n a pet a, ram tana a khelhpui Edouard Mendy chuan a save sak.
‘Sudden death’ an kai a, Hakim Ziyech leh Diogo Jota ten an pet goal hnuah Mason Mount pet chu Alisson-a’n a dansak a. Greek left-back Kostas Tsimikas chuan chakna penalty a khung.
Liverpool manager Jurgen Klopp chuan, “Ka naute hi an thawhrimna leh tlawm lo tura an beihna avangin ka chhuang hle. Inkhel hautak leh ropui tak a ni a, penalty shootout boruak kha a sang tak zet.”
“Carabao Cup ang thovin kan inthlauhna a tlem a, Chelsea an kheltha tak zet a, a tawpah erawh chak an awm a ngai a, keini kan ni ta zawk.” tiin a sawi.