West Bengal Chief Minister Mamata Banerjee chuan BJP chu Adolf Hitler, Joseph Stalin leh Benito Mussolini te ai pawhin ro an relna a chhe zawk niin a sawi.
Mamata hian Thawhtanni khan sorkar laipui chuan central agency hrang hrangte chu state chhung thilah a inrawlhtir nasa niin a puh a. “BJP kaihhruai sorkar hian sorkar laipuia rorelna kalhmang chu a nawr chhe mek a ni,” a ti.
Banerjee chuan Kolkata-a thuthar lakhawmtute a kawmnaah, “BJP hi Adolf Hitler, Joseph Stalin leh Benito Mussolini te ai pawhin an rorelna a chhe zawk,” a ti.
Central agency-te chu mipui rorelna vawnghim tura thu an neihna chin pek tur an nih thu a sawi bawk.
“BJP kaihhruai sorkar laipui hian central agency-te hi state bil thila inrawlh turin a tir thin a, sorkar laipui kalhmang chu a nawr chhe mek zel a. Tughlaqi rorelna ang kha an kalpui a ni,” a ti.
“Heng agency-te hi thu an neihna chin pek ngei tur an ni a, politics-in a bawhbuai phak lovin hna an thawk tur a ni,” a ti bawk.
Mamata-i kaihhruai Trinamool Congress hian Bengal-ah ro rel mekin BJP nen hian nasa taka inbei reng an ni.