Max Verstappen-a vanneihna a kaltluang a, a elpui Ferrari car khalhtu Charles Leclerc chuan pakhatna a hauh ngei dawn nia a lanlaiin a car engine chiang lo avangin a tlan zo thei lova. Pathianni zana Spanish Grand Prix-ah Dutch driver in pakhatna a hauh.
Formula 1 world champion ni lai Verstappen hian Circuit de Barcelona-Catalunya a intlansiakah harsatna a tawk hnem a, a tawpah erawh vanneihna a lamah a tang a, hnehna changin world championship-ah tun season a vawikhatna atan hma a hruai.
A teammate Sergio Perez chuan pahnihna a hauh a, Mexican driver hi tlan tha hle in a team in Verstappen kian tura an tih vang chauhin pakhatna a hauh lo.
Mercedes driver thar zawk George Russell-a’n car khalh harsa tak an nei chunga tun season a beisei a khum thin chu a chhunzawm a, pathumna a hauh. Mercedes car in hmasawn lam a pan tih erawh a hmuh theih a, intlansiak tan tira Kevin Magnussen nen an intai avanga a hnung ber dawt a a tlak thlak hnuah Lewis Hamilton chuan pangana a hauh thei.
Tun kartawpah Monaco-ah intlansiak a ni leh dawn a. Leclerc-a pian leh seilenna khua niin point rukin a elpui Verstappen a pha lo mek.
Vanduai hnuah vannei
Tun season-ah Verstappen-a chungah vanduaina a thleng thei hle a, intlansiak hmasa pathumah vawi hnih tlan zo lovin point an hloh a, mahse tunhnai intlansiak hnuhnung pathumah erawh pakhatna a hauh vek.
Spain a intlansiakah hian Ferrari car an pha lo a, qualifying leh intlansiakah Italian team an tlanchak a, ‘car upgrade’ an hman ve chu Ferrari in an chakpui.
Leclerc-a’n a hmasa ber atanga bul tanin bul a tan tha a, lap 9-naah kual 4-naah thli thaw nasa in a beng fuh loh avangin Verstappen a vir a, palinaah a tla thla. Hemi hma pawh hian Leclerc nena an inkar a zau hman tawh.
Verstappen-a’n harsatna dang a tawk leh bawk a, pathumna a awm George Russell aiin a car tlanchak zawk mahse British driver ainveng thiam a. Hei chauh hi ni lovin intlan pelhna ‘Drag Reduction System’ chu Verstappen-a car-ah a chiang lova, DRS a hman theihin a car thla a inhawng thei lo leh thin.
Lap 19 chhung Russell-a’n Verstappen a dan hnuah Dutch driver in a pel.
Lap 27-naah erawh Leclerc-a vanduaina a thleng a, a car engine chu chiang lo avangin a tlan chhunzawm thei lo.
Hmahruaitu ber a awm loh hnuah Verstappen chu Red Bull in pakhatna hauh tir an tum a, a hma a awm a teammate Sergio Perez chu kian turin a vawi hnih nan an ti nawn a, Mexican driver lawm lo mahse team thutlukna a pawm.
Verstappen chuan, “A hnung ka veng zo lova, kha vang khan ka vir. Ka DRS a chiang lo bawk a, kha khan a ti harsa zual, bul tan chhe mah ila a tawp dawn erawh a lawmawm. Ruahmanna kan neih a hlawhtling a ni.” a ti.
“Harsatna a lo thlen hian rilru ah thil tam tak a lo lang a, thinur loh te a har thin. Mahse pakhatna leh pahnihna hauh hi team tan result tha tak a ni.” tiin a sawi.