Hun eng emaw chen Colombia-a thiltithei tak, Cali drugs cartel hotupa chu United States-a a tannaah a thi.
Gilberto Rodríguez Orejuela-a hian a hun lai chuan khawvela a ruka cocaine-a sumdawnna ram zau tak thununin Pablo Escobar-a nena inel tawk tak an ni.
Kum 83 a ni tawh a, dan hmanga man a nih loh nan leh a hmelmaten an nan fuh loh nan hmun hrang hranga a insawn kual chhen avangin Chess Player tia sawi thin a ni.
Kum 1995 khan a vanneihnain a tlin ta lo va, Colombia-ah man niin kum 2004 khan US-ah thawn chhuah a ni.
Cartel hruaitu hlui hi North Carolina-ah kum 30 tang tura hrem niin Thawhlehni khan a chhungten a thi tih an sawi.
A vanglai chuan Cali drugs cartel hi a unaupa, Miguel nen an kaihruai thin.
US Drug Enforcement Administration (DEA)-in a chhinchhiah dan chuan Cali gang hian kum 1990 chho velah khan khawvel puma cocaine sumdawnna 80% vel an thunun a ni.
An sumdawnna a len hi kum 1993 vel atang khan niin police-in a elpui lian ber, Medellin cartel hotupa, Escobar-a an thah atang khan a intan a ni.
Escobar-a pawlte hi Colombia-a tharum thawh nasaa hriat an ni a, Rodríguez Orejuela unau erawh sumdawng zahawm tak angin an inlan thung thin.
A hnu zelah phei chuan politician thiltithei deuhte chu thamin thuneitute chu Medellín mite laka che na zual tur pawhin an nawr theih phah a ni.
Rodríguez Orejuela hian amah hi ‘damdawi dawr lian tak enkawltu’ angin a insawi thin a, hei hi an chhungkuain damdawi dawr an neih hmanga a insawina a ni.
A tak takah erawh chuan Cali cartel hian tharum an hmang nasa hle thung a. Kum tam tak chhung chu Medellín mite nen pawh cocaine sumdawnna leh a thawn chhuahna kawnga thuneihna inchuhin an indo thin.
Rodríguez Orejuela unau hian bomb pawh an hmang a, mi enthlatu tha tak tak pawh an nei thin a. Escobar-a laichin leh a thawhpui mi 60 vel thihnaah mawh an phur nia ngaih a ni.
Kum 1980 chho atanga pawl pahnih inbeihna avang hian gang member, drug dealer leh mi pangngai za tel an thi a ni.
Cali cartel hi kum 1995-a Cali-a a chenna ina Gilberto Rodríguez Orejuela an man atangin an zui tan ta a ni.
Man a nih kumah hian an pawl hruaitu lawk pasarih zinga paruk chu thi leh lung ina dah vek an ni.
A nau, Miguel pawh Gilberto-a man a nih atanga thla hnihah man a ni a, US-ah vek a tang mek.