Mizoram state BJP president Vanlalhmuaka’n Chief Minister Zoramthanga chu ramri chingfel tura inchi khat pawh la pen lovah puhin, “A kaihhruai MNF sorkar thil ngaihpawimawh ber chu Kamrul-a leh Abu Mazumdar kaltlanga sum siam chiah a ni” a ti.
Kolasib press club-a thuthar thehdarhtute a kawmnaah BJP, Mizoram state president chuan he thu hi nimin khan a sawi a. Central sorkarin mipui hmathatna tur scheme hrang hrang a dun te chu thlei bik nei lova kalpui tur a nih laiin, in sak tanpuina dawng tur Congress hunlaia thlan, 1st installment dawng te chu MNF sorkarin 2nd installment pe zui lovin an mi duhzawngte hnenah 1st installment angin an pe ve leh niin a sawi.
Mizoram sorkar a hmuhdan zawhna ch- hangin Vanlalhmuaka chuan “India ramah Mizoram sorkar hi development hnathawhah kan hniam lawrlak” a ti a. Hnathawh tam zawkah zaa 99 chu central-in a puihna atanga thawh a nih thu a sawi.
“Mizoram sorkar- in development hi a ngai pawimawh lemlo tiin, “A ngaihpawimawh ber chu Kamrul-a leh Abu Mazumdar kaltlanga sum siam chiah a ni,” a ti.
Assam nena Mizoram ramri chungchang zawhna chu Vanlalhmuaka chuan kum 2019 NEDA meeting-ah union home minister Amit Shah-a’n all party meeting neia sawikhawm hmasa tur leh kum 2023 hma ngeia ramri chinfel tum tura a chah thua chhangin, hemi hnua harsatna a la awm a nih chuan a hnena thlen turin a chah niin a sawi a. Mizoram atangin hma kan la lova, kan chief minister hi ramri chingfel turin inchi khatmah a la pen lo,” a ti bawk.
Vanlalhmuaka chuan BJP-in India rama kum 8 rorelna an chan denchhena an hnathawh leh hmachhawp te sawiin, Central sorkarin district tina medical college din tura ruahmanna a kalpui mek thu a sawi a. Mizoram-in AIIMS a mamawh thu leh BJP-in an nawr zui zel thu leh state sorkar atang erawh chuan nawrna a awm lo niin a sawi. Heng bakah BJP leh central sorkar hmalakna leh hmachhawp hrang hrang te a sawi bawk a ni.