Aizawl: Congress party President Lalsawta chuan inthlanpui lo awm turah MNF an sorkar chhunzawm a nih chuan Mizoram hi chenna tlak lohah an chhuah mai ang tih a hlauhawm tih a sawi.
Congress Bhavan Golden Hall-a MPCC Political Session neihah nimin khan Lalsawta hian thu a sawi a. Zoram mipuite tan nakkum inthlanah Congress party an sorkar ngei a ngai tih sawiin, “MNF-te an sorkar chhunzawm a nih chuan kan chhuan em em kan ram, ‘kan Zotlang ram nuam,’ kan lo tih fo hi chenna tlak lohin an chhuah mai ang tih a hlauhawm a. MNF-ten sorkarna an chang chhunzawm a nih chuan ‘Mizo ka ni’ tia kan lo inchhuan venate pawh boin ‘Mizo ka ni’ tia sawi pawh thil zahthlak tak a ni thei a ni,” a ti.
MPCC President Lalsawta hian, “Khawvel ram changkang tak takte leh ram ropui tak takte, ram hausa em emte nen hian thil neih inang pahnih kan nei a, ram leh mipui hi kan nei kawp a ni,” a ti a; Congress party pawhin ram leh mipui hmangin Mizoram hi nuam taka siam an tum thu leh ram nuam siam turin Congress party hi an tling tawk a, Mizo mipuite pawh an ringtawk tih a sawi.
Finance minister hlui, Lalsawta chuan Congress party hian sorkar ngawr ngawr hi an tum a nih loh thu sawiin, sorkar tha siam turin an inbuatsaih mek zawk tih a sawi bawk.
“Sorkarna changa hma an lakna turah kan hausa emaw, kan rethei emaw, kan ngaih pawimawh hmasak ber tur chu kan environment chhe ta lutuk leh tuihna kâm chak lutuk hi a ni a. Kum tinin kan tuihna a kam telh telh a, tun atanga kum 20 lo kal turah hian Aizawl khawpui hian khawi lui tui nge kan rin tawh ang, hetiang lama kan rilru kan sen nasat angai a, development-a kan hmalakna hmasa ber tur chu environment-ah a ni,” a ti a ni.
Inkhawm hi LT. Hrangchal, General Secretary, MPCC-in kaihhruaiin an party-in |omir Fehchhuah Programme a neih zawh taka fehchhuakten an zin report pein John Siamkunga, General Secretary, MPCC-in thu a sawi bawk.