Hriatrengna! A hming mai pawh hian lung a van kuai chiang em. Mahse, a lo thleng a, a ral leh duak mai bawk si. Ka hringnuna thil thleng hriatreng tlak te hi ka hlut em avang erawh chuan heti mai a bo duak hi ka remti thei lo. Ka fa lo piang hi kum khat a tlin thlenga a nuna thil thleng leh keimaha lo lan dante nen lam chhin-chhiah ka duh a ni.
A vawikhat nuihna te, ka vawikhat lenchhuahpuina te, a pi leh pute bula hun a hman hmasak ber dan te, a tawngkam chhuak hmasa ber te, barbie doll leh toys a neih hmasak ber te.. aaa a tam mai. Heng thil thleng leh hlimthla tam tak lo langte hi damchhung daih tura chhin chhiah i duh em le?
Khai le, a naupan laia nang leh i fa inkara thil thleng dangdai leh danglam tak tak lo thleng turte tha taka chhin chhiah dan hetiang hian i han tarlang dawn teh ang:
Birthday letters
A piancham lo thlen a piangin lehkhathawn ziak thin la, kum khat chhunga i nuna thil thleng lungngaithlak leh hlimawmte kha ziak ang che. I beisei loh tak lo thleng te, lung-awi thlak tehchiam lo te nen lam a leng vek ang.
Kum 6-8 a nih kumah heng letter te hi han present teh le. Thlir chhunzawm rawh. Present azawnga duhawm tak hian a naupan lai hunte a chhiar anga, a hmel leh cheziaa danglamna lo thleng tur chu i hlimpui ngei ang le.
Thlalak, thlalak
Mobile phone-ah camera tha tak tak a awm tawh a, still a ni emaw video nen lam a kim biai tawh. A lo pian phat atang khan i la char char thei a, kawr mawi/thar a neih tuma a lan dan te, a hnap tawlh lai leh a tah vak vak laite pawh record vek ang che.
A lo berah uluk takin thlakhatah vawikhat tal a thla lak sak la, kum tawpah ama pualin calendar mawi tak i siam thei ang. Kumtina a danglam dante chu chiang takin a lo lang nghal mai dawn a, chhungkhat laina hnaite present pek atan pawh a tha em em a ni.
Hun bik leh ni bik
Chhungkuaa in awm kim laia a vawikhat zaina te, a vawikhatna ni tura a tawngtai leh bible a chhiar lai te, kut benga a lam dawrh dawrh lai te pawh kha still leh video-in la thin ang che.
Thlalak hnuaiah khan comment ziak zel la, a hun laia thil thleng leh i rilru a lo awm ang ang kha thai lang thin ang che. Fiamthu lam hawi pawh a sual lo a ni.
Birthday interviews
Heng zawhnate hi a pian-champha phak a lo thlen apiangin zawt ang che:
- In zirtirute zingah tunge i duh ber?
- Film hmuhnawm i tih ber?
- I thiantha ber?
- Eng toys nge i duh ber adt.
Kum a lo inthlak danglam ang zelin, zawhna ngai a chhan dan pawh a inang lo nuai dawn a, a rei poh leh a nuihzatthlak ting mai dawn a, chhungkua ang pawha hlimna tham a tling hrim hrim tawh.
A kutchhuakte
Lem a ziah hmasak ber te, a chei (coloring) hmasak ber te leh lehkhabu-a a thuziak te nen lam khan chep thla la, tha takin box-ah dah ang che.
Thil dahthat turah hian ho lua leh te tham engmah a awm lova, i rilru-a lo awm dan ang ang khan chechhuak la, hun a lo rei anga, nu leh pa an nih hnu-ah phei chuan an hlut dan tur leh an hlimpui dan turte kha mitthla ah suangtuah lawk ang che. Tun atang hian tan nghal rawh le.