United States-ah inpawng kahna a thleng leh a. Inrinni zan (India rama Pathianni zing) khan Philadelphia khawpuia kawtthler lun takah mi pathum kah hlum niin mi dang 11-in hliam an tuar bawk tih police-in an sawi.
Inkahna thlenna hi zan lama kawtthler lun tak thinah a ni.
Police Inspector D. F. Pace chuan mipa pahnih leh hmeichhia pakhat kah hlum an nih thu thuthar lakhawmtute hnenah a sawi a. A hmuna kal officer-te chuan silai hi mi pakhat aia tamin an hmet puak niin an sawi tih a sawi bawk.
“Kartawp apianga an tih thin angin South Street-ah hian mi an tam hle a, mi tam lai tak hian inkahna a thleng,” tiin Pace chuan a sawi.
Silai a puah tan lai hian officer eng emaw zat an awm sa a, hei pawh hi kartawpah chuan zan lama an tih ziah thin niin a sawi.
Officer pakhat chuan silai hmet puaktu zinga pakhat chu a kap a, a silai thlauhvin a tlanchhia a, kah fuh a ni em tih erawh hriat a ni lo tih Pace chuan a sawi.
Tual chhung chanchinbute chuan tumah man an la awm lo niin an tar lang hlawm.
Pace chuan inkahna hmunah hian semi-automatic handgun pahnih, pakhata a mu bawm la awm an chhar thu a sawi.
Police hian a bul hnaia sumdawnna hmun liante chu an inkhar tawh hlawm avangin an CCTV camera-a thil thleng lak fuh awmte chu Pathiannia an inhawn hunah an en hlawm tur thu Pace hian a sawi.
Pace chuan an chhui mek chinah hriat tur a la tam lo hle tih sawiin, “Chhan rih loh zawhna tam tak a la awm,” a ti.
Inkahna bul hnaia lo awm, kum 23 mi, Joe Smith chuan The Philadelphia Inquirer hnenah silai ri a hriat rual khan a buai nghal vek thu a sawi a. “Te thawm ka hre zui nghal a ni,” a ti.
Eric Walsh-a pawhin mi an tlanchhe nghal nasa hle niin a sawi a, thenkhat pheikhawka thisen kai te, thingthi leh bawkkhup pawh a hmuh thu a sawi.
The Inquirer hian he thil thlenna piah lawkah a hnu darkar hnih velah mi pakhat kah hliam a nih thu an tar lang bawk a; mahse, police chuan a hmaa mi nena inzawmna nei lo nia an hriat thu an sawi.