Aizawl: Hachhek bialtu MLA Lalrindika Ralte chuan ram hruaitute chu ram an hruai dan thlirin Pathian ruat an ang lo thin tih a sawi.
MPCC Tomir fehchhuah hman rualin Inrinni khan Hachhek bialtu MLA hian a bial chhunga South Block area a tlawh a. Bial a fanna hmun hrang hrang thu sawiin Lalrindika Ralte hian, “Israel fate kha Pathianin hruaitu tur a ruatsak thin a, hriak a thih hial thin. Tunlai hunah erawh chuan ram hruaitu thenkhatte hi Pathian ruat an ni vek ta lo em ni tih tur a ni fo a. Pathian ruat an ni tia an dik lohnaah pawh sawisel thiang lo anga an indah a nih chuan a dik hauh lo,” a ti.
Lalrindika Ralte hian sorkar sum hi mipui sum, mipui thawh chhuah vek a ni tih sawiin, “Sorkar sum hi party fund a ni lo a, politics khelh nana hman tur a ni lo. NLUP a nih avangin Congress sum a ni lo a, SEDP a nih tak avang hian MNF sum a ni hek lo,” a ti.
Sorkar sum hi mipui pawisa a nih avangin fimkhur taka hman a tul tih a sawi.
Mizoram mipuiin hmasawn an phu laia hmasawnna hnathawh tithuanawp vek khawpa ram hruaitute leh hnathawktute an hlemhle duh chu pawi a tih thu a sawi.
Mahni dinhmun siam that nan chauha politics khel thinte hi ram leh khawtlang hmelma an nih avangin hnawl ngam tur an ni tih a sawi bawk.
Hachhek bialah khua 32 awmin, tun tumah hian bialtu MLA hian khaw pariat a tlawh tawh a. Hun remchang hmasa berah a bial chhunga Central Block leh South Block lam a tlawh leh a tum a ni.