AIZAWL: CLS Academy, Nursery Veng, Aizawlin kumina HSLC exam hmachhawn an zirlaite tha taka an pass vek avangin Inrinni khan Ajal Club-ah an lawm a, he hun hi Aizawl West III bialtu MLA VL Zaithanzama’n a telpui.
CLS Academy-a zirlai kumina HSLC exam mi 12 ten distinction-ah an pass vek a, nikumah pawh zirlai 12 bawkin HSLC exam-in distinction-ah an pass vek bawk.
Kum 2018-a din CLS Academy-ah hian kum 2020 atang khan High School hawn tan niin, HSLC exam an hmachhawn tawh vawihnihah an zirlai te distinction-ah an la pass vek a ni.
HSLC pass lawmna hun hmanpuitu Aizawl West III bialtu MLA VL Zaithanzama chuan a bial chhunga CLS Academy a awm chu lawmawm a tih thu sawiin, HSLC exam-ah a kum zawna an zirlaite an pass kim vek mai ni lova, distinction-ah vek an pass thei chu chhuanawm a tih thu leh a lawmpui thu a sawi.
Zirlaite chu anmahni leh chhungkaw tan chauh zir lova Mizoram tan theihtawp chhuaha zir turin bialtu MLA chuan a chah a. Central service-a inziaktling thei khawpa thiamna leh taihmakna an neih a pawimawh thu sawiin, central service lama kal tura tun atanga rilru nei turin a chah bawk.
VL Zaithanzama chuan zirna kawnga tanlak nasat a tul thu sawiin, private sikul ten theihtawp chhuaha hma an lak laiin, sorkar sikul te erawh chu a enkawltu sorkarin a hlamchhiah avangin nasa takin an hnungtawlh thung niin a sawi a. A simtha turin Education minister pawhin hma a la mek nia a lan thu sawiin, “A hlawhtlinna tak tak chu an result-ah a lo lang thung dawn a ni” a ti.