Grape chingtute dinhmun ngaihtuah a ngai tak zet
Excise minister chuan tunhnaia grape wine mante chu tihpalh thilthua man an nih thu leh zu kaihhnawih zuar an awm tih report an dawn avanga dap beihpui thlak an nih thu sawiin, grape wine an lo man ve ta mai erawh tihpalh thil thu liau liau anih thu a sawi thung a, pek let an tum thu erawh a sawi lo thung.
Grape chingtuten sorkar chu an harsatna hrang hrang sutkiansak tumin vawi tam dawrin, nawr tawh mahse vawiin thlengin chhanna a la awm lo a, sorkar nen an thu a la inhmu thei lo tluang zel bawk.
Heti tak maia kan ram tharchhuah hnualsuat leh man kawnga kan che chak duh ta mai hi ngaihtuah chian a ngai hle a, kohhran thenkhatin inremna neihpuiin, kohhran serh leh sang atan an lo hman tawhna pawh sorkar hian eng hu-ah mah ngai lovin, a namnul ngam sak sak ta hle tih hairual ni ta lo bawk.
Sorkar hian eng rilru nge a put chhoh zel dawn a hriat loh a, tih palh thila a mante hi a tihpalh tak zet a nih chuan a pe kir dawn nge, kohhran thenkhatte hi namnulin, zu kaihhnawih khap kawngah a vaihma tel ve vek dawn tih chu mipui lam thlir mek a ni ta.
A thlangtute mipui tho kan nih avang hian sorkar hian a mipuite zai hi ngaithiam se la, saipui kal nguah nguah lo hram ngei bawk teh se.