Pathianni kaltaa a pa Salim Khan nena thaha vauna lehkha an dawn hnu ah Maharashtra sorkar chuan Salman Khan venhimna khauh zawkin a kalpui nghal.
Bandra Bandstand, Mumbai-a vauna lehkha hnutchhiah ah hian “Tumhara Moose Wala kar denge (Moose Wala ang bawkin i tawpna hun i hman ang) tiin tunhnaia Punjabi zaithiam lar Moose Wala chungchang ziahlan a ni.
He lehkha ah hian Salman Khan leh a pa Salim Khan te hming chiang taka tarlan a ni a, Police te chuan FIR ziaklut nghalin an ngai thutak hle.
Salim Khan hi lehkha an hmuhchhuahna hmun leh chhehvelah zing a walk thin a, Pathianni khan a thutna thin bench-ah vauna lehkha hi a lo awm a ni.
Security guard kaltlangin police hriattir nghal a ni a, a statement te lak a nih hnu-ah thubuai hi ziahluh a ni.
Vauna lehkha hmuh a nih thu a hriat veleh Abu Dhabi-a IIFA Awards 2022 chhima thang mek Salman Khan hi Pathianni la la khan a thlawk haw nghal a, amah leh chhungte himna a ngai pawimawh hle.