Cristiano Ronaldo chuan Portugal tan goal hnih a khung zanah Switzerland lakah an ram a chakpui a. 4-0 in Portugal hian UEFA Nations League-ah hnehna an chang.
Lisbon khawpui a Estadio Jose Alvalade a inkhelah hian Portugal tan William Carvalho leh Joao Cancelo ten goal an khung ve bawk a. Mualneitu lamin goal hlauhawm an insiamhnem a, goal khung belhna remchang an hloh nual.
Switzerland hi kum 2008 a Germany laka 4-0 a an tlawm hnua an tlawm chian ber tum an hmang.
Portugal hian Ningani zanah Czech Republic an hmachhawn leh ang.
Spain an chelh
Pathianni zan inkhel dangah Spain in vawi hnih an si phurh sut an mamawh a, huntawp dawna defender Inigo Martinez goal khung hmangin 2-2 in Czech Republic nen an inhnehtawk.
Prague a Sinobo Stadium a inkhelah Sparta Prague forward Jakub Pesek chuan minute 4-naah goal a khung nghal a. Hei hi halftime dawnah Spain midfielder Gavi chuan a sut a, Spain tana goal khung thei naupang ber ani.
Minute 66-naah forward Jan Kuchta chuan Czech Republic tan goal a khung ve leh a, minute 90-naah Spain hi Martinez-a’n a chhandam hlauh.
Inkhel dang
Norway striker Erling Haaland chuan ram tan match 19 a khelhnaah goal hnih a khung a. Norway tan goal 18 a khung tawh.
Haaland hian minute 20-naah penalty a khung a, minute 69-naah khung belh leh bawkin Sweden 2-1 in an hneh a. Sweden tan forward Anthony Elanga chuan goal a khung.