Russia-in khawthlang ramte vaukhan mek mah se UK chuan hmun hla zawk kap thei missile chu Ukraine hnenah thawn a tum tan tih defence secretary chuan a sawi.
Ben Wallace chuan M270 multiple-launch rocket system hian Russia laka a inven nan Ukraine chu nasa takin a pui dawn niin a sawi.
Sorkar chuan engzat nge a thawn dawn tih a la tichiang lo va; mahse, BBC chuan pathum a ni dawn niin a tar lang.
Kar hmasaah khan United States chuan Kyiv hi rocket system a thawn dawn tih a lo sawi tawh bawk.
US-in M142 High Mobility Artillery Rocket System (HIMARS) a thawn tur puan hian Moscow a tithinrim hle a. Pathianni khan Russian President Vladimir Putin chuan a chhan let nan Russia-in Ukraine ram zau zawk a beih tur thu a sawi.
UK sorkar chuan a ralthuam thawn tur hman dan zir hian Ukrainian sipaite chu UK-ah zirtirna an pe hmasa dawn niin a sawi.
Multiple-launch rocket system hian khawmual atanga khawmual kahna missile 12 zet chu minute khat lek chhungin a kap thei a, km 80-a hlaa mi chu a fuh chat thei bawk a. Tuna Ukraine-in laipui a hmante lakah chuan tha tak a ni.
Wallace chuan ‘dan pela ram dang atanga rûntute laka Ukranian-te an invenhimna atana ralthuam pawimawhte petu-ah’ UK chu a hmahruaiah a tang zel dawn tih a sawi.
“Russia-in a tih dan (tactic) a thlak pawhin Ukraine hi kan tan zel ang. Multiple-launch rocket system hi Putin-a sipaite ralsai thei laipui hmanga an khawpuite lainat lek lova an chhut chhiatsak laka kan thian Ukrainian-te an invenna tur tha a ni,” a ti.
Kar hmasa khan Washington chuan HIMARS multiple rocket launcher pali chu Ukraine hnenah thawnin mahni inven nan chauh hmang tur leh Russia ram chhunga kap lut lo tura tih an ni a. UK-in M270 system a pek tur pawh hi hetiang atan baka hmang lo tura tih an ni bawk.
UK hian indona a chhuah tan tirh khan Ukraine hnenah hian tank kahna, next generation light anti-tank weapon, Nlaw an tih chu 5,000 chuang a lo thawn tawh a. He hmanrua hi Kyiv pawhin hmang tangkaiin lei lama Russian-ten an nawrchep tum ang aiin an chet theih loh phah niin mi thiamte chuan an sawi.
Heng bakah hian hmun hla lem lo kap thei Brimstone 1 missile, Mastiff armoured vehicle leh Starstreak missile air defence system te pawh UK hian Ukraine hnenah hian a lo pe tawh a, hengte hi £ maktaduai 750 man vel zet a ni.
Ram dangte pawhin Ukraine hnenah hian ralthuam pek an tiam hlawm a. Germany chuan air defence system an neiha a tun lai ber, Iris-T chu pek an tum a, hei hi Russia-in boruak atanga an khawpui a kaha khawpui pum ven theihna tur a ni.