US-in Ukraine hnena ralthuam pek a tum chungchangah hian Russian president a thinrim hle a. Pathianni khan sorkar TV hnenah Putin-a chuan, “Tlang taka sawi chuan he thil hi ralthuam inpekna a ni a, tum pakhat chiah a awm niin ka ngai a, chu chu a theih chhung he indona hi ralthuam nena chettir a ni,” a ti.
Russian hruaitu hian hmun hla zawk kap thei missile-ten Ukraine a thleng a nih phawt chuan an ram chuan ‘a chhang let dawn’ tih a sawi a, ‘tuna kan kah loh hmunte kan kap ang’ tiin a sawi.
Putin-a’n khawthlang ram a vau mek lai hian Pathianni khan Kyiv khawpui chu nasa taka kah a ni a, hei hi chawlhkar eng emaw zat chhunga kah a nih vawi khatna a ni a, Donbas region-ah erawh khua leh khawpui hrang hrangah inkahna a nasa hle thung.
Russia hian Kyiv bawr atanga a sipaite a hnuh kir hnuah March thla tawp lam atang khan Donbas lam hi a bitum leh mek.
Indona a nasat deuhna hmun zingah khawchhak lama Severodonetsk khawpui a tel a. He khawpui hi an la a nih chuan Luhansk region chu Russian sipaite leh helai vela Ukraine atanga inlak hran tum pawlten an la a ni nghal mai dawn a, inlak hran tum pawl hian an thenawm, Donetsk pawh an thunun mek tawh a. Heng hmun hnih hi Donbas-a industry tamna hmun a ni.
Pathianni khan Ukrainian President Zelensky chuan khawchhak lam, Donbas region-a ral hmatawngte chu Lysychansk khawpui leh Soledar khuaah a tlawh.