BJP hotu lian pakhatin Prophet Mohammed-a chungchang a sawi dan avanga thinrimin Kuwaiti supermarket chuan Indian thil siam an zawrhte chu an pho chhuak duh lo va, Iran pawhin an rama Indian palai chu eng nge thil awmzia sawi fiah turin a ko bawk.
Al-Ardiya Co-Operative Society dawra thawkte chuan Indian thingpui leh thil dangte chu trolley hmanga nawr chhuakin ‘Islam sakhaw hlauhna’ ang chi zawnga thil sawi duh lohna an lantir.
Middle East-a Saudi Arabia, Qatar leh ram dang bakah Cairo-a Al-Azhar University chuan BJP thupuangtu pakhat thil sawi an dem thu an sawi a, thupuangtu hi party-in a chawlhtir tawh.
Kuwait City daia supermarket-ah chuan buhfai leh hmarcha dahnate chu plastic sheet-a khuh vek a ni a. Arabic-in, “Indian siam kan dah bo,” tiin an ziak.
“Keini, Kuwaiti Muslim-te hian Prophet sawi chhiat hi kan ngaizam thei lo,” tiin an CEO Nasser Al-Mutairi chuan AFP a hrilh a. An An dawr dangah pawh boycott vek an tum tih a sawi.
BJP thupuangtu, Nupur Sharma-i thu sawi hian Muslim-te a tithinrim hle a. Kar hmasa khan TV-a thil sawihonaah Uttar Pradesh-a buaina chhuakah Muslim a dem a, man phut pawh an tam hle.
A thu sawi avang hian Muslim ram tam tak an thinrim.
BJP chuan Pathianni khan Sharma-i hian an party dinna lo ang tak thlirna a neih thu sawiin sakhaw tin zah vek tur a nih thu an sawi.
Sharma-i chuan thu a sawi chungchang kha Twitter-ah tar langin, Hindu Pathian, Shiva sawi chhiatna a chhan letna a nih thu a sawi.
“Ka thu sawite khan sakhua leh tute pawh a lo tina a nih chuan ka hnuk kir leh e,” a ti.
Gulf ramte hi ram pawna India hnathawka chhuakte awm tamna ber niin ram danga hnathawk mi maktaduai 13.5 zinga maktaduai 8.7 zet chu heng rama awm hi niin foreign ministry chuan a tar lang.
India thil siamte chaw lut tam ram an ni bawk a, Kuwait phei hi chuan an chaw lam thil 95% zet chu India atanga an lak luh niin trade minister chuan a sawi.
Kuwaiti chanchinbute chuan New Delhi-in wheat thawn chhuah a tihtawp pawh an ram bikah chuan thawn reng turin an ram hotuten an ngen niin an tar lang nghe nghe.
Muslim thinrim
Pathianni khan Qatar chuan India chu ‘Islam sakhaw hlauhna’ lam hawi thu sawi a awm avangin ngaihdam dil tura a phut thu a sawi a. Tuialhtheia hausa tak ram hi Vice-President Venkaiah Naidu chuan sumdawnna huang zauhna turin a tlawh mek nghe nghe.
Qatar bakah hian Kuwait ramte chuan an rama Indian palai awm lakah sorkar leh mipui aiawhin thu sawi an duh loh thu an hrilh bawk tih sorkar news agency IRNA chuan Pathianni tlai khan a tar lang.
Muslim zirna in hriat hlawh leh pawimawh tak, Al-Azhar University-a zirlaite chuan Sharma-i thu sawi chu ‘firfiakna dik tak’ an ti a, ‘khawvel puma thihna thlen thei buaina leh indona chawk chhuak thei’ a nih thu an sawi.
Saudi Arabia-a hmunpui nei, Muslim World League chuan thu sawi chu ‘huatna thil’ niin an sawi a. Saudi Arabia-a Affairs of the Grand Mosque & Prophet’s Mosque General Presidency chuan ‘nunrawng taka chetna’ niin a sawi bawk.
Sharma-i thu sawi hi Gulf ram parukte inzawm khawmna, Gulf Cooperation Council chuan an dem a, an pawm lo va, an ngai thutak hle tih an sawi.
Bahrain chuan BJP-in a nihna atanga Sharma-i an chawlhtir nghal chu lawmawm an tih thu an sawi ve bawk.