- Ruata
South Korea company tha leh hlun tak Hyundai chuan tunhnai lawkah an subcompact SUV hralh kal tak Venue chu a hmelthar nen a thar an tichhuak a. Tunah hian an SUV man to te zinga mi Creta leh Alcazar te chunga awm Hyundai Tucson chu thlaleh ni 13-ah a thar tichhuak turin ruahmanna an siam leh ta.
Hyundai hian ramchhungah lirthei hrang hrang tuna Tucson thar kan tarlan tur bakah hian Creta facelift, Kona EV thar leh Ioniq 5 electric crossover te la tihchhuah chhoh zel an tum a. Tunah hian an SUV chhuak sa tha tak mai Tucson chu a thar an tihchhuah dawn thu an puang leh ta a ni. Hyundai Tucson hi Mizoramah pawh kan hmuh tawh lirthei a ni a, kan state angah chuan SUV man to leh tha pawl tak, changkang bawk si a ni a, SUV tha leh changkang tak lei tum tan chuan rei nghah a ngai tawh dawn lo a ni.
Design leh thildang
Hyundai Tucson chhuak thar tur hi wheelbase sei chi version a ni dawn a, hemi awmzia chu a ke hnung leh hma leia a innghahna lai thuizawng sawina a ni a. Heti a nih chuan SUV lian tha tak,a chhung pawh zau tha tak a ni dawn a ni. Hei hi Long Wheelbase (LWB) Tucson tiin an sawi bawk a, a wheelbase hi 2756mm a thui a ni dawn a, tuna European model aiin a chhung a zau nuam dawn a ni. Tuna ramdanga chhuak hian 19 inch alloy wheel a hmang mek a, India-a chhuak tur hian 18 inch wheel a neih a rinawm a, India ram kawng tana tha tura ngaih a ke te hret leh tyre sang hret ho a hmang ang.
Venue thara kan hmuh ang tho Hyundai design thar ‘Sensuous Sportiness’ design language chu Tucson-ah pawh hian kan hmuh hmel a, Creta facelift-ah pawh hei hi kan la hmuh hmel bawk a ni. He SUV thar tur hian parametric front grille, DRLs invuah tel bakah dark chrome rawng a neih hmel a, hei ringawt pawh hi a mawi dawn viau a ni.
LED headlamp unit leh a turn signal te hi a hma bumper-ah mawi takin a awm dawn a, air duct a nei dawn bawk a ni. A hnunglamah chuan quad tail-lights an tih LED bar anga awm Venue thara kan hmuh ang zul deuh bakah bumper thar, diamond texture nei leh faux skid plate te kan hmu dawn a ni.
A chhung
Hyundai Tucson thar tur hi a mawi dawn viau a, hmanraw changkang hrang hrang a rawn nei dawn bawk a. He SUV thar tur hian clutter-free cabin an tih, a chhunga hmehna tur button hrang hrang tlem thei ang ber leh felfai thei ang ber a nei dawn a. He SUV thar turah hian dual-screen infotainment system, 10.3-inch display nei, climate control leh thildang hrang hrang thununa awm a nei dawn a. He infotainment system hian Android Auto, Apple CarPlay leh two-device Bluetooth connectivity a nei dawn a ni. Heng bakah hian Hyundai BlueLink connected car tech, digital instrument console, panoramic sunroof, automatic AC, cruise control leh ADAS feature te a nei dawn bawk a ni.
A khawl
2022 Hyundai Tucson lo chhuak tur hi petrol leh diesel hmang a lo chhuak dawn a. Tuna chhuak mek khawl hi a rawn tawm mai hmel a, hetah hian 2.0-litre petrol khawl, 150bhp power leh 192Nm torque pechhuak thei, 6-speed automatic torque converter automatic transmission nei a awm ang a. Hei bakah hian 2.0-litre turbo diesel khawl, 182bhp power leh 400Nm torque pechhuak thei, 8-speed automatic gearbox nei a awm dawn bawk a ni.