India rama state hausa ber, Maharashtra-ah politics-a inpawhna lian tak thleng mekin sorkar lai a tlu dawn nge a ding zui dawn ngaihchan mek a ni.
State sorkar minister hlun ber pakhat, Eknath Shinde chuan rorel lai party, Shiv Sena-in MLA a neih zinga 40 atangin thlawpna a hmu niin a insawi.
A helna hian Sena kaihhruai tangrual sorkar chu tlu mai thei dinhmunah a dah mek.
An party hruaitu hlun tak tak, Chief Minister Uddhav Thackeray pawh telin, Shinde hi dawrin kir leh turin an ti a; mahse, tun thlengin engtih mah a la chhang lo.
An state-a rei tak lo thawk dun tawh, Sena leh BJP chu kum 2019-a an state inthlan zawh hnu lawkah khan thuneihna insem dan tura an inrem loh avangin an inthen.
Hemi tum hian BJP chuan bial 288 awmah bial 106 lain MLA ngah ber an ni a; mahse, Sena hian Nationalist Congress Party (NCP) leh India-a eptu party lian ber, Congress party bakah party tenau leh independent MLA-te nen tangrual sorkar an siam.
Sawi dan thenkhatah chuan Shinde hian BJP nena thawhho leha thuneihna chan leh a duh niin tar lan a ni.
Tun karah boruak inmung hi irh chhuakin Shinde leh Thackeray-a te hian an lamtang MLA ve ve chu khualbukah an tawmpui a, hei hi a khawi lam zawk zawk pawhin an inthlem thluk zel loh nana tih a ni.
India rama anti-defection law an tih hmanga MLA an nihna paih a nih loh nan Shinde-a hian MLA 37 thlawpna a mamawh a. Tunah hian Sena MLA 40 bakah independent MLA paruk thlawpna a nei tawh niin a insawi a; mahse, finfiahna chiang tak a awm lo.
A lama tangte nen hian Shinde-a hi hmarchhaka Assam-a khualbukah an inkulh mek a, Thawhlehnia an thlen hlimin BJP hruaitu pahnihin an lo dawngsawng nghe nghe a ni.
Maharashtra sorkar buaina hi Thawhtannia legislative council inthlan atang khan niin Sena hruaitu hlun, Shinde hi biakpawh theih lohva a awm atangin a ni.
Sena leh a thawhpuite hi bial 10 inthlan turah bial ruk la ngei tura ngaih an ni a; mahse, result puan a nih meuh chuan panga chauh an la ta a. Bial li la tura ngaih, BJP chuan bial nga an la ve a, hei hi Sena MLA hel zinga miten an vote ve vang nia sawi a ni.
Inthlan result a chhuah hnu lawkah hian Shinde hi a lamtang Sena MLA 11-te nen khawthlang lama Surat khawpuiah an kal nghal a, an inkulh hrang nghal a ni.
A chet dan duh lo hian Thackeray-a pawhin Shinde-a hi an party-a a nihna a hlihsak zui nghal bawk.
Shinde-a pawh hian Twitter-a a nihna a tar lan thina Sena hruaitu a nih thu a tar lan chu a paih zui ve nghal a, Gujarat-a an inkulhna khualbukah hian BJP hruaitute nen pawhin an an lenchilh ngei tih hriat a ni bawk.