New Delhi-ah India hmarchhak hmeichhiate chu mipat hmeichhiatna lam hawiin chhaih nawmnah an ni a, social media-ah nasa taka thehdarh a ni.
Video-ah hian tlangval rual thenkhatin hmeichhe rual kawng kal chu chhaihin an inzawrhna man zat an zawt tih a lang.
He thil hi Hauz Khas venga thleng niin video hi hmeichhe zinga pakhatin a lak niin social media-ah thehdarh a ni.
Video clip-ah hian mipate hian, “Rate kya hai?” tiin inzuar angin an au el vel tih a lang.
Hmeichhiaten an sawi dan chuan heng tlangval rual hian Hauz Khas venga an kal chu lo tidingin darkar hun hmanpui man engzat nge an nih an lo zawt tih an sawi.
Hmeichhiate hian an kalsan nghal a, a hnua video lang zelah chuan an chet danah ngaihdam an dil tih pawh a lang thei.
Delhi Police chuan he thil thleng chungchangah hian thubuai an ziak lut a. Delhi Police Special Commissioner Robin Hibu chuan mipate hi tute nge an nih man tuma zawn mek an nih thu a sawi.
Zirlai pawl hrang hrangin heng mipate lakah hian na taka chet an duh thu an sawi.
Assam-a Bajali district-a mi, Bhattadev University-a zirlai pakhat, “Ram indan atang khan hmarchhak mite hian diriam kan tawng nasa a. Niminah kan ram khawpui berah pawh khatiang kha a thleng leh a ni,” a ti.
“Hmarchhak mite hi ‘chinki’ leh ‘Chinese’ tia koh kan ni fo va. Mipuite pawh hian kan indaidanna thiat tura hma kan laka sorkar pawhin hetiang thil thleng thin tihtawp nana hma chak zawka a lak a ngai a ni,” a ti.