Aizawl: Aizawl Two-Wheeler Taxi Association (ATTA) chuan nimin khan General Body Meeting an nei a, Transport Minister TJ Lalnuntluanga’n hmanpuiin, lirthei khalhtute chu ram economy siamtu pawimawh tak an nih thu a sawi.
Vanapa Hall-a ATTA inkhawmpuiah khuallian, TJ Lalnuntluanga chuan thu sawiin, taxi khalhtute chu ram hmel lanna an nih thu a sawi a. Lirthei khalhtute hi ram economy siamtu pawimawh tak an nih avangin ram hmasawn nan an pawimawh tih sawiin, “Nationalism kalpuitu tur pawimawh tak an ni,” a ti.
TJ Lalnuntluanga hian taxi khalhtute chu mi dang tan malsawmna nih tum theuh tura chahin, “Taxi kan khalhpui kan thiante tan pawh malsawmna thlentu nih tum tur leh inkungkaihna tha a awm theih nan thawhhona tha kan neih a tul hle a, taxi kan khalhna kawngah mi dangte thu ngaichanga duham bik lutuk leh stand-a ding rei lutukte ngaihtuah lek loa lo duham fal bik lutukte hi a tha lo hle,” tiin a sawi.
Transport minister hian taxi khalhtute hi rilru thianghlim te, zaidamna te, dawhtheihna te leh teirei peihna te an neih a pawimawh tih a sawi a. “Miten kan chungah emaw, an chungah emaw, thil an tihpalhin kan tipalh ve thei a, hawihawm tak leh zawldawh taka mi dangte kan hmachhawn thin tur a ni. Chumiah chuan rah tha tak inremna a awm thin a ni,” a ti bawk.
ATTA General Body Meeting-ah hian ATTA dintute chawimawina hun hman a ni bawk.