Aizawl: Animal Husbandry & Veterinary (AH&Vety) Minister Dr K Beichhua chuan African Swine Fever (ASF) vanga vawk suatte tana zangnadawmna pek tur chungchangah sum sanction hmuh veleh pek chhuah nghal an nih tur thu a sawi.
AH&Vety minister hian nimin khan Pig Producers’ Cooperative Ltd (PIGFED Ltd) Annual General Meeting chu Veterinary Polyclinic Hospital Conference Hall-ah khuallian niin a hawng.
Thu sawiin ASF vanga vawk suatte tana sorkar laipuia zangnadawmna chungchangah March thla khan sorkar laipuiin a tum ve tur 50%, Rs. vaibelchhe 5 vel an lo pek tawh thu leh, state sorkar pawhin 50% a tum ve tur pawh finance department changtu, chief minister-in pek a lo remtih tawh thu a sawi.
“District tina DVO te chu fimkhur taka vawk an suatsakte lehkha pawimawh lakhawma lehkha an neihte enfiah turin hriattir an ni tawh a. Expenditure sanction hmuh veleh direct-in beneficiary-te bank account-ah khungsak an ni ang,” a ti.
Dr K Beichhua chuan ASF avanga ran vulhtute mangan turzia a hriatthiampui tih sawiin, he harsatna karah beidawnga, kut kuangkuaha awm reng a nih loh thu a sawi a. Vawk vulhtute chu chhungkua leh khawtlang hmasawnna atan theihtawp chhuak zel turin a chah bawk.