Mizo tlawmngaihna vawngtu Mizo tlangvalte an la awm e
Kan kawtkai mai, kan chakkhai lakna hnar Silchar-ah tui a lian nasa hle a, kan Mizo puite ngei pawh chanchin inhretawn hlei thei lo khawpin an awm. Power supply a awm tha thei lo a, inbiak pawhna zawng zawng a buai phah hle bawk.
Tuilianin kam lam a pan mai si lo, khawlaite chu kawngpui nge tuihawk luankawr thuk deuh tih pawh hriat hleih theih loh khawpin tuiin a chim mar put a. Mahni sahimna zawnga theih tawp chhuaha damkhawchhuah tuma beih chu mitin tih tur a ni ber tawhin a hriat a ni.
Mizoram sorkar chuan a sipai 29 te chu Mizo awmte chhanchhuak turin a tir thla rawih a, an hmanraw neih chhun ang angte chu Silchar awmna state Assam hmanraw neihte lakah chuan nep tak a ni. Mahse, chutah chuan Mizo tlangval chuan Mizo tlawmngaihna nen hna an thawk si! An hmanraw neih a nep hle chungin hmanraw tha neitute thlen ngam lohna thleng thlengin zu thleng a!
Tu tu nge awm a, tute nge la chhanchhuah loh tih hre turin inbiakpawhna ber a mumal miau si lo. Mahse, Silchar khaw chhunga tanpui ngai nia an hriat mi 33-te an awmna hmun atangin lawng hmangin Mission Compound-ah hruai chhuah vek an ni a, Mizoram Police-te hian Silchar YMA puihnain NDRF leh Assam Regiment, Masimpur ten an chhanchhuah theih loh hnam dang mi 10 chuang chu an chhanchhuak tel bawk. Chu hna zu thawktute chu kan Mizo tlawmngaihna la awmzia vawngtu, Mizo tlangvalte tho an ni e.