Kartawp kan hmang chho leh ta reng mai. Kartluana hna thawk a, hun awl nei hman lek lova buai vut vut thin te tan kartawp hi a nghahhlelhawm zual. Hahdam taka thut veng veng a, mahni duhzawng movie en te hian kan hahdam sawng sawng thin. Thil danga rilru leh ngaihtuahna seng lova, movie tha leh hmuhnawm en turin han inbuatsaih phawt mai ta che.
A hnuaiah shows leh movie tha tak tak, hlim taka kartawp hman tir theitu tur chhawpchhuah a ni:
Bhool Bhulaiyaa 2
Kartik Aaryan leh Kiara Advanic te channa film hi June 19 khan Netflix-ah tlangzarh a ni tawh a. Horror comedy pui takah hian inhre ngai lo Reet leh Ruhan te chu mak danglam takin an intawng hlawl mai. Tlang leh mualpawng atanga intanin, a hnu lawkah Rajasthan-a In lian tak, rauhsan tawh ni bawkah chuan a tawp a tawpah an thleng ta hlawl mai a, thlarauin kum 18 chhung a lo chenchilh tawh leh khungbeh tlatna a la ni zui.
Cinema hall lamah i lo la en fuh lo a naih chuan hmet chhuak keuh rawh le, kartawp dangdai takin i hmang dawn tih a chiang reng mai.
The Umbrella Academy Season 3
Hmeichhe dang dang atanga lo piang chhuak naupang pasarih te chanchin dangdai, danglam leh mak angreng tak tarlanna hi June 22 khan Netflix-ah vawrhchhuahin a lo awm tawh.
Series lar chho tak a ni nghal a, naupang pasarih te hi billionaire industrialist Sir Raginald Hargreeves-a’n fa a tana la in, khawvel chhe tawh tak chhanchhuak leh tura inbuatsaihna a neihpui dan hi kartawp hman nawm tir thei tur che a ni tlat.
Elliot Page, Tom Hopper, Emmy Raver-Lampman leh midangte an inlan a, season 3-na hi a pui riau.
Doctor Strange: In The Multiverse Of Madness
Disney+Hotstar en thinte tan hmiah chi a ni lovang. June 22-a tlangzarha Dr Stephen Strange chuan anchhia hman thiang loh hmangin thil lian tham tak a hawng ta ruau mai a, film a kal chho zel a, buaipui ngaihna awm lo leh manganthlak tak bawk si, vauna leh tihthaihna chuan a umzui nghal ta vut vut mai le.
Benedict Cumberbatch leh Elizabeth Olsen te thiam takin an inlan.
Runway 34
Ajay Devgn, Rakul Preet Singh leh Amitabh Bachchan te channa film hmuhnawm tak hi nimin mai khan Amazon Prime Videos-ah tlangzarh a ni. Pilot pakhatin thlawhna a thlawhchhuahpui hnu lawka thil makpui pui a tawn chhoh nghal mawlh mawlhna niin, pilot nuna thil lo thleng tur hi hriat a chakawm hle mai.
Weekend hmangin en nuam le!