Aizawl: Mizoram Pradesh Congress Committee (MPCC) President Lalsawta chuan Congress MLA turte chu sorkar hmelhmang tidanglam turin mipui hmaa thu tiam an lak a phut tih a sawi.
Congress Bhawan-ah party chhung inkhawmah thu sawiin Congress chu committee-a kal a nih thu sawiin, bial viltu pawh committee leh bial mipuite ngaihdan ngaichang chungin Pathianin a pe thuai dawn tih a sawi a. Congress MLA turten thu tiam an lak a phut tih sawiin, “An eiruk dawn loh thu te, dik takin an kal dawn a ni tihte, mi harsa zawk te, lo neitute tan te, sorkara rinawm taka hnathawkte tan anmahni indah tha a, mipui tana rawng an bawl tur thu tiam an lak ka duh,” a ti.
That loh theih lohna bawmin a phuar theih loh leh tha duh tlat lote an bawmah an tel ve dawn lo tih sawiin, “That hi a harsa lo. Tha duh lo chu that theih lohna hmuna awm tura an kal mai a ngai. Mi tha zawkin min rawn zawm zel ang,” a ti.
Congress president hian MNF sorkar hnuaiah Krismas vawi khat chiah hman tur an nei tawh tih a sawi a. Mizoram mipuiten hun harsa dang MNF sorkar hnuaia an hman nawn loh hramna turin rilru dik leh inpekna thar nen, mi dang tibeidawngtu ni loa beiseina pe a, an tana rintlak leh rin ngam ni a, danglam a tul ang zela ram tana danglam ngam zel turin a sawm tih a sawi.
“Kan beisei ang hmasawnna thlentir turin Mizoram mipui kan tanrual a ngai. Zeldin thu leh tehkhin thute nena inawih liam nan hun kan nei tawh lo,” Lalsawta hian a ti.