Kolasib district-ah kuminah June thla thleng khan TB vei hmuhchhuah mi 100 an awm a, an zinga 5 chu multi-drug resistant TB vei an ni.
Kolasib District TB Forum thutkhawm nimina neihah he thu hi SMO, Dr RK Lalthlamuana'n a sawi a. Piramal Swasthya nena thawkhova TB zawnchhuah beihpui zawh takah Kolasib district-a khaw 41 atangin TB vei rinhlelh- awm mi 1104 te sample lak atangin 16-in TB an vei tih hmuhchhuah a nikh thu a sawi a. Community health centre leh Primary health centre atanga kumina sample 29,666 endik tawhah TB vei 4 hmuhchhuah an nih tawh thu a sawi.
Dr RK Lalthlamuana chuan kum kalta (2021) khan Kolasib district-ah TB vei mi 68 hmuhchhuah an nih thu sawiin, heng zinga mi 3 chu multi-drug resistant TB vei an nih thu a sawi bawk.
District TB Forum chuan TB vei enkawl lai ten damdawi a hun taka ei an ngaihpawimawh a tul thu sawiin, TB vei ten enkawlna an dawn chhungin thla tin Rs. 500 an dawn theih thu leh an dam hnuah pawh tribal incentive Rs. 750 an dawn theih thu an sawi a. Inenkawlna kalpui chhungin, treatment support, Rs. 1,000 atanga Rs. 5,000 thleng an dawn theih thu District TB Forum chuan an sawi bawk a ni.