AIZAWL: Lunglei District Sports Complex, Rahsi Veng, Lungleia sakna tur lungphum chu nimin khan Minister C. Lalrinsanga’n a phum a, Sports Minister Robert Romawia Royte-in a telpui bawk.
Sorkar thuchhuahin a tarlan danin Lunglei District Sports Complex hi sorkar laipuia Minority Affairs ministry hnuaia Pradhan Mantri Jan Vikas Karyakram (PMJVK) atanga Rs. nuai 4919.31 senga sak tura ruahman a ni a. Assistant Engineer, Mizoram State Sports Council James Lalramnghaka'n technical report a peka a lan danin, Lunglei District Sports Complex sakna atana sum ruahman Rs. nuai 4919.31 chu pawm a ni tawh a, za-a 90 (Rs. nuai 4427. 38) chu sorkar laipui tum tur niin, za-a 10 (Rs. nuai 491.93) chu State sorkar tum tur a ni thung.
August 31, 2021 khan sorkar laipui atangin 1st instalment Rs. nuai 2213.69 dawn a ni tawh a. Tender tawh niin, he hna thawk tur hian M/S Consortium of Leitlang Consultant and Décor India, Guwahati te thlan a ni.
Lungphum phumtu Minister C. Lalrinsanga chuan Sports infrastructure dang liantham tak tak - Leitlangpui Hockey ground, Futsal Ground, Ramthar Veng, Zobawk Residential Sports School, Electric Veng Astro Turf Football Ground te pawh din mek a nih thu a sawi a. Khawvel changkang chho zelah infiamna chu eizawnna a tlin bakah thalaite nun a tha zawnga kaihruai theitu leh zuk leh hmuam leh ruihhlo laka fihlim theihna tura hmanraw pawimawh tak a la nih zel tur thu a sawi.
Sports Minister Robert Romawi Royte pawhin District Sports Complex atana sanction hmuh chu thil awlailo tak nia sawiin, a kentel infrastructure hrang hrangte chu Lunglei district mipui bakah Zoram pum rohlu a nih tur thu a sawi a. Lunglei khawpui chhungah Rs nuai 11,000 man hnathawh chhoh mek a nih thu sawiin, Sports department hnuaia Lunglei project zawng zawng atan contractor thlan fel vek an nih tawh thu leh July 2022 chhunga project zawng zawng thawh tan vek a nih tur thu a sawi bawk.