Paresh Barua-a kaihhruai ULFA (I) chuan Myanmar-a an awm hmun sawnin tunah chuan Ruili, Yunnan Province, China-ah an awm tawh niin sorkar laipui chuan a sawi.
Union ministry of home affairs (MHA)-in Guwahati-a Unlawful Activities (Prevention) Tribunal hnena affidavit an thehluhah he pawl hian Myanmar-a an inkhuarna chu chhuahsanin China lam an pan tawh niin an ziak tih Times of India chanchinbu chuan a tar lang.
Kum tam tak chhung chu ULFA (I) chief hi China chhim lam, Myanmar nena an inrina bul lawk, Ruili-ah hian a lo awm tawh nia tar lan a ni a. Hetih hun lai hian an pawl operational base leh training camp-te chu India nena inrina bul lawk, Sagaing division, Myanmar-ah an dah thung niin tar lan a ni.
Assam sorkarin tribunal-a affidavit a thehluh ve thungah chuan Myanmar sipaiten Takga-a Indian helte awmna camp chu January 28, 2019 khan beiin hemi tum hian Lungmark, Taka leh Nilgiri-a ULFA (I) camp pawh an kap a. Nasa taka tichhiain an pawm mi eng emaw zat pawh an pawla kir leh tawh lovin an tlanchhia niin an tar lang ve thung.
State sorkarin affidavit an thehlutah hian Sagaing division-a ULFA (I)-in NSCN (K) puihnaa camp an neihna hmun riat lai an tar lang bawk.
Guwahati-a tribunal hnenah hian Assam sorkar chuan ULFA (I) helho hian Information Technology lama mi thiam zawkte an chaw lut mek a, Darknet hmunah hengho awmhmun khuarna hmun hi siamin dan kengkawhtute chhaih buai an tum nia sawi a ni.