Mamit district MJA member-ten nimin khan Hachhek Biala Kuhva Chingtu Pawl (HBKCP) leh Taitesena leh Langkaih Group YMA bakah Hachhek Jt. VC ten tun hnaia dan lova kuhva tawlh an manna leh an kuhva man sate tu tih hriat lohten an halna hmun, Zamuang an tlawh a. HBKCP hruaituten dan lova kuhva lakluh avanga harsatna an tawh dante an lo hrilh.
HBKCP General Secretary Kanan Lalhlimawma’n foreign kuhva dan lova lalut thinten Assam state-ah harsatna an tawk thin tih sawiin, Hachhek biala kuhva tharte ngei pawh Assam lama a leitu turten Myanmar atanga dan lova lakluha an ngaih thin avangin harsatna an tawh nasat phah hle niin a sawi.
Kanan Lalhlimawma chuan khaw 11-a an pawl, HBKCP member-ten nikum khan kuhva Rs. nuai 2,741 man an thar thu sawiin kuminah Rs. nuai 3,000 chuang lakluh an inbeisei laiin Myanmar atanga dan lova kuhva lakluhin harsatna a thlen nasat avangin an beisei an pha dawn lo nia a lan thu a sawi bawk.
Zamuang khua bika kuhva chingtu pawla an president, Lalzawna Pachuau pawhin an khuaa kuhva chingtu pawl member-ten nikumah Rs. nuai 579 man an thar thu leh kuminah nuai 600-700 man vel thar an inbeisei laiin dan lova kuhva tawlh a kal reng avangin a hlawm tama hralh tura a leitu tur lam nena inremna siampui pawh an la awm theih loh thu a sawi.
HBKCP hruaituten an sawi danin Hachhek bialah hian Challianbuanga, Saikhawthlir chu kuhva ching hmasa nia hriat a ni a, a hnen atang hian kum 1963/4 velah Rengdil khaw mi - Khawma, Lianchhunga, Thangkuma, Lalnghinglova leh Kapvela ten kuhva tiak lain an khuaah an ching tan ve leh a. Rambuai avangin an duh angin hma an la thei lo va, rambuai a ziaawm hnu, 1970 chhovah chhunzawm chho leh in, Zamuang khuaah Saikhala’n 1975 vel atangin tih tak takin a ti ve leh bawk a, ani phei hi chuan sorkar hna a bansan phah hial a. Tunah chuan Hachhek biala chhungkaw tam takin kuhva huan siam chu eizawnna bulpui berah an neih tawh a ni.