Mizoram Super League season 7 champion inchuh tur a chiang tawh a. Champion lai Zarkawt BCA hmaah league a pahnihna hauhtu Khatla TBL an ding dawn.
Ningani zan khan Play In tournament-ah Khatla TBL hian 105-74 in Mission Veng Hotshots an thunun a. Post season a inkhel hnem Hotshots in chawlh hahdamna hun nei zawk team an ngam lo.
Final luh inchuhna inkhela an tlinna turin Hotshots hian Tuikual South BC lakah inkhel hautak vawi hnih an khelh a ngai a, an hlawhtlin tuk zanah an inkhel chhunzawm lehnghal.
Inkhel tan atangin Khatla TBL an chungnung a, quarter tinah point an in score tam hleih a. Hotshots player-te an rim tawh tih a hriat a, defense-ah zan danga an inpekna anga kha mar taka hmuh tur a awm lo.
Khatla TBL tan Vanlalthazuala chuan 3 points vawi 12 a shoot atang vawi 7 a lut a, point 31 a score a, rebounds vawi 7 la in assist vawi 10 a nei. Levi Bradley Jr. chuan point 30 score in 3 vawi nga a lut ve bawk.
Mission Veng Hotshots tan Joshua Aaron Keyes chuan point 30 score in team tana thawh hnem ber a ni a. Zonunsanga leh Lalrozama ten point 17 leh 11 an score ve thung.
MSL7 final hi best-of-three series tur a ni a. Game 1 hi Thawhlehni zan dar 8:30-ah an khel ang.
Ningani zanah Game 2 khelin Inrinni zanah Game 3 khelh a ni ang.
Final a intum tur pahnihte hi tun season-ah vawikhat ve ve league-ah an inhneh tawh. MSL final-ah an vawi thum intawnna a ni ang.
Zarkawt BCA hi an final-ah an hlawhtling a nih chuan a zawnin vawi 4 an champion-na a ni dawn a. Kum 2018 March thla a Tuikual South an hneh hnuah MSL Final series-ah an la tlawm leh lo.