Kumina a Grand Slam title pathumna lak a tum laiin Rafael Nadal chuan Wimbledon-ah champion trophy a chuh thei dawn lova. Semi-final a Nick Kyrgios nen inkhel tur an nih laiin inhliam avangin a inhnuhdawh a ngai.
Kum 36 mi Spanish star hian quarter-final a Taylor Fritz nen inkhel hautak tak an khelh hma pawhin pum bawrah tihrawl hliam a nei tawh a. Fritz nen an ninkhelh hian set hnihnaah hliam avanga enkawl a ngai a, harsatna nei chungin set nga chhung a khel tluan thei a, hnehna a chang tho.
Nadal chuan, “Tennis ka khelh chhung hian hliam neuh neuh nei chung pawha khelh zel hi ka tum thin a ni a, mahse tun tumah ka inkhelh luih chuan ka tihnat belh dawn tih kha a chiang reng.” tiin a thutlukna siam a sawifiah a. “Nilengin ka inngaihtuah a, thutlukna siam a ngai tih ka hria. Chak thei lo tur leh khel zo thei lo tura inkhelh khan awmzia a nei lo.” tiin a sawi.
Grand Slam title 22 la tawh Nadal hian Ningani khan hliam nei chungin mipui hmuh theih lovah practice a nei a, a hliamin hma a sawn loh avangin a inhnuhdawh thu a puang.
Nadal hian semi-final ah hian Australian mi Nick Kyrgios a hmachhawn dawn a, a inkhelh theih tak loh avangin Kyrgios hi final-ah a tlang nghal dawn a. Nizana Novak Djokovic leh Cameron Norrie te inkhela chak zawk a lo nghak mek.
Kumin a Australian Open leh French Open a champion tawh Nadal hi Fritz nen an inkhelh tum hian a hliam a na tih a inkhel entu zinga tel a farnu leh a pa ten an hrethiam nghal a, khel tluan lo mai tura an tih hnuah khel lui zuiin a chak.