Aizawl: Tun hnaia excise department-in grape wine zawrh lai an mansak zinga mi thihna chungchangah Mizoram Pradesh Youth Congress Committee (MPYCC) chuan nimin khan zangnadawmna pe tura an phut thu Excise Minister Dr K Beichhua hnenah ziakin an thlen.
MPYCC Vice President Laltawnliana chuan an thil phutte a chhiar chhuah hnuah excise minister hnenah lehkha a hlan a ni.
Congress Thalai chuan May 27, 2022-a Lalhriatpuii, Dawrpui Vengthar chu excise department-in an grape wine zawrh lai mansakin a eizawnna ve ber grape wine a zawrh theih tak loh avangin a mangang em em a, chhungkaw ei zawngtu ber a nih angin a rilru hah avangin a nunna hial a chân ta chu a runthlak an tih thu an lehkha theh luhah an tar lang.
July 13, 2022 chhun dar 12 hma ngeia Mizoram sorkarin Lalhriatpuii chhungte hnenah zangnadawmna Rs. nuai 100 pe ngei turin an phut thu leh, an pe lo a nih chuan a tul anga hma an lak tur thu an hriattir a nih tih an tar lang.