Sorkara an thil phut hrang hrangte tihpuitlinsak ngiata nuar mek, NHM, Mizoram hnuaia thawkte chungah sorkar a khawng tawh dawn a, thupek zawm lote chungah dan angin hmalak a tum.
NHM, Mizoram hnuaia thawkte an nawrh mek chungchangah hian nimin khan health department-a Principal Secretary Esther Lal Ruatkimi leh Department of Personnel & Administrative Reforms (DP&R) Secretary R Lalramnghaka ten SAD Conference Hall, MINECO-ah chanchinbumite an kawm a, National Health Mission Employee Union Mizoram (NEUM) chungchanga sorkar hmalak dan tur an sawi.
Principal Secretary Esther Lal Ruatkimi chuan NHM, Mizoram hnuaia thawkte chu ni thum chhung an chawlh chhungin sorkar hotuten an dawr fo a, an nawrh thulh turin an ngen tih a sawi a, zawldawh taka an ngaihchan hnu pawha an nawrh chhunzawm takah chuan sorkar chu a khawng tawh dawn tih sawiin, “Thupek zawm lote chungah dan angin hma lak a ni ang,” a ti.
Health department-a principal secretary chuan NHM chungchang sawifiahin, he scheme hi bi nei, a hnuaia thawkte pawh kum khat atana thawk tura lak an ni tih a sawi a, NHM hnuaia thawk tur lak a nihin kum khat atana thawk turin engagement order an siam a, appoinment order pek an ni lo a, condition tam tak awmin a thawk turten hming an ziah hnan tih a sawi.
Chung thawktute chu controlling officer-ten kum khat chhung an hnathawh dan enin thawk zel tlaka ngaih chu chhawr chhunzawm an ni tih sawiin, “Controlling officer ten an hnathawh dan an report dan ang zela chawlhtir theih an ni a, engagement order ang chuan bân awl viau mah se sorkarin awlsam taka inchawlhtir erawh a duh lo,” a ti.
An hlawh chungchang sawi fiah bawkin, NHM chu sorkar laipui scheme a nih angin a hnuaia thawkte hlawh chu zaa 90 chu sorkar laipui tum a ni a, zaa 10 chu state sorkar tum a nih thu a sawi a, an hlawh tur chu kum khat daih tur pek lawk an ni lo a, installment-a pek an ni tih leh a hnuh chhuah kawngah tih tur tam tak a awm avangin a khaihlak chang a awm thin tih a sawi.
Esther-i chuan NHM hnuaia thawkte dinhmun zirchiang tura din study group report pawh zir chian mek a ni a, an hamthatna tur hrang hrangte ngaihtuah a nih mek laia an nuar chu a hun lo an tih thu a sawi a; damdawi lama inenkawlna hmuna thawk mi 2,000 chuang an nawrh avanga mipuiin an tuar mek chu sorkarin pawi a tih thu a sawi bawk.
DP&R Secretary Lalramnghaka chuan Mizoram sorkar hnuaia department 16 laiah centrally sponsored scheme (CSS) hnuaia thawk an awm tih a sawi a, chung mite dinhmun zirchiang tura din study group report chu leh recommendation chu April 26 khan chief minister leh sorkar hotu dangte hnenah theh luh a ni tawh a, law & judicial department-in endikin vetting an nei zo fel a, DP&AR lamah process leh mek a nih thu a sawi.
Hetianga central scheme/project leh EAP hnuaia thawktu lak chu tun hnai thil mai a ni lova, state ministry hrang hrang lo awm tawhte hunlai atanga zawi zawia lo awm an nih avangin nghawng tam tak - recruitment dan dinglai te, service dinhmuna dan awmsa te leh sum leh pai a nghawng dan tur te, constitutional provision violate theih a awm leh awm loh zawng zawng te en hmasak a ngai tih sawiin, “Chuvangin, sorkar tan awlsam taka thutlukna siam mai theih a ni lo,” a ti.
CSS hnuaia thawkte hi NEUM chauh an nih loh avangin an tan bika thil kalpui a theih lo a, nghak ve hram hram se an duh tih a sawi a, an nawrh titawp se an duh thu a sawi bawk a ni.