Droupadi Murmu chu India ram president zinga a zawna July 25-a rinawma thu tiamtiam lak luh 10-na a ni dawn ta a, kum 1977 atang khan July 25-ah zel president thar hi lak luh an la ni.
Kum 1977 atang khan India-in president a neih tawh zawng zawngte chu July 25-ah zel lak luh an ni.
India rama president hmasa ber, Rajendra Prasad kha January 26, 1950 khan lak luh niin hei hi India-in mahnia dan hnuaia rorelna hrang a neih intanna ni a ni.
Kum 1952 khan president thlan hmasak berah hnehna a chang zui a, president inthlana hnehna chang zawn hmasa ber ni zuiin May, 1962 thleng a pisa a luah a ni.
Sarvepalli Radhakrishnan khan president atan May 13, 1962 khan lak luh niin May 13, 1967 thleng a pisa a luah.
President pahnih, Zakir Husain leh Fakhruddin Ali Ahmed te kha an hun an hman zawh hmaa an thih avangin an hun chhung tur pisa an luah tluan thei lo.
President parukna, Neelam Sanjiva Reddy khan July 25, 1977-ah lak luh a ni.
Hemi hnuah president thutthlenga thu zui ta - Giani Zail Singh, R Venkataraman, Shankar Dayal Sharma, KR Narayanan, APJ Abdul Kalam, Pratibha Patil, Pranab Mukherjee leh Ram Nath Kovind te chu July 25-ah vek lak luh an ni ta a ni.
Tribal politician, Murmu-i hi July 21 khan president thar atan hian thlan tlin a ni.
Rorel lai, BJP leh a thawhpuiten an vawrh chhuah, kum 64 mi hi Odisha mi niin zirtirtu leh state governor pawh lo ni tawh a ni.
Murmu-i hi India-a tribal zinga chanvo sang ber chelh hmasa ber leh hmeichhe president pahnihna a ni dawn.
India-ah hian president hi thuneitu sang ber ni mah se a thuneihna hi ama thuin a hmang thei lo.
President thlanah khan Murmu-i hian eptu tangrualten an vawrh chhuah, politician hlun tak, Yashwant Sinha a hneh a. Sinha hi Prime Minister Atal Bihari Vajpayee-a kaihhruai BJP sorkarah minister pawh a lo ni tawh thin a; mahse, tunah chuan Prime Minister Narendra Modi-a sorkar sawiseltu ber a ni tawh thung.
Murmu-i hian July 24-a a hun tawp, President Ram Nath Kovind a thlak dawn a ni.
President thlan dawn khan BJP leh an tanrualpuite chuan chuh tura an tih hming 20 an thlan chhuah atangin Murmu-i hi an thlang chhuak a ni.
Amah hian president chuh turin an party-in an thlang tih hi television leh chanchinthar atangin a lo hre ve a, a phurin a barakhaih hle tih a sawi nghe nghe.