Kum 2021 chhunga vawk pul hri, African Swine Fever (ASF) darh zel tur venna atana AH&Vety department-in vawk an suatsak chhungkuate tan zangnadawmna pek chhuah tan a ni.
AH&Vety Minister Dr K Beichhua hoin nimin khan Khatlaa Vety Polyclinic Hospital Conference Hall-ah ASF vanga vawk suatsak chhungkuate zangnadawmna pek chhuah inkhawm neih a ni.
Mizoram hi vawk suat avanga sorkar laipuiin a scheme neih sa atanga India ram puma zangnadawmna dil leh a pek awmchhun a ni.
Department hriatpuinaa vawk suatsak avanga zangnadawmna dawngtu chhungkuate hi Aizawlah 1,058, Lungleiah 220, Hnahthialah 140, Saitualah 56, Siaha-ah 50, Serchhipah 744 leh Mamitah 220 niin, an vaiin chhungkaw 2,488 an ni.
Zangnadawmna pek chhuah zat belhkhawm chu Rs 10,48,42,200 a ni.
Sorkar laipui dan ding lai angin vawk kg 15 hnuai lam tan Rs 2,200; kg 15-40 tan Rs 5,800; kg 40-70 tan Rs 8,400; kg 70-100 tan Rs 12,000 leh kg 100 chung lam tan Rs 15,000 a ni a. Vawk chaw an lo dahkhawl pawh tihchhiat vek tur a nih avangin vawk chaw kg 1 zelah Rs 22 ruahman a ni bawk.
AH&Vety Minister Dr K Beichhua chuan ASF vanga vawk thi zawng zawngte zangnadawmna pek an duh laiin, sorkar laipuiin inkaihruaina a lo neih sa ang baka kal a theih loh avangin AH&Vety department hriatpuina a vawk suatte chauh zangnadawmna an pe thei tih a sawi a. Sorkar laipui leh state sorkar sum thawh tur hi 50-50 a nih avangin mipuite manganna hriatpuia state sorkarin a do letna tur sum petu Chief Minister Zoramthanga chungah lawmthu a sawi.
Dr K Beichhua chuan ASF kai vawk thite zangnadawmna tur pawh planning department kaltlangin an bawhzui tih a sawi a, chief minister-in Prime Minister Narendra Modi hnenah PM’s Special Package anga pe turin lehkha a thawn thu a sawi bawk.
Dr Lalhmingthanga, Addl. Director (VS&PH) in he huna a tar lan danin, National Action Plan hnuaia ASF nuai bona atana hmalakna lian tak dang chu culling (vawk suat) hi a ni a. Infected area chhunga mi zawng chu hri la kai lo pawh suat vek tur a ni.
Mizoramah pawh hei hi a theih ang chin chinah kalpui a ni a. Vawk neitute remtihna la hmasa vekin vawk suat hi kalpui a ni.
Vawk suatna atan hian sorkar laipui chuan zangnadawmna pek theih dan ruahmanna a siam a ni.District hrang hranga pek tur zat :
Aizawl Rs. 4,00,68,200
Lunglei Rs. 78,37,400
Hnahthial Rs. 35,21,000
Saitual Rs. 15,31,200
Siaha Rs. 12,51,800
Serchhip Rs. 2,55,53,400
Mamit Rs. 2,80,79,200
TOTAL Rs. 10,48,42,200