Aizawl: Mara Autonomous District Council (MADC) term 12-na executive thar a din hnua session hmasa ber, ni thum chhung awh fur thukhawm chu nimin atang khan MADC Session Hall-ah tan a ni.
Session hi MADC Chairman N. Viakhu-in a kaihruai a, session neih chhunga Penal of chairman atan MDC pahnih - MH.Tiabi leh T. Seido MDC te ruat an nih thu a puang.
Chawhma lamah zawhna leh chhanna hun hman nghal a ni a, K. Hrahmo zawhna chhangin CEM H.Malvin chuan Sixth Scheduled Amendment hlawhtlinna turin MADC-in an bawhzui dawn tih a sawi.
Zyhno bialtu, L.Prisila zawhna chhangin CEM H.Malvina chuan Officer Posting & Transfer siam a tum thu leh middle school leh primary school zirtirtu transfer an awm thu a sawi a; elementary school, Samagra chu MADC hnuaia a awm theih nan hmalak mek a nih thu a sawi bawk.
Nimin chawhma thutkhawmah hian zawhna, starred question pasarih chhan a ni a, ziaka chhan chi zawhna pahnih chhangin house dawhkanah dah a ni bawk.
Chawhnu lamah House Leader Nahlo- Solo, EM i/c Revenue chuan ‘The Mara Autonomous District Council. (Money Lending- Bill 2022’ chu a pharh a, Controller & Auditor General (CAG) report house-ah pharh a ni bawk.
Session hi vawiin chhunzawm leh a ni ang.