Ramri chungchangah kan dinna hriat thar fo a tul
Assam leh Mizoramin ramri buai kan la nei reng dawn a, vawilehkhata reh nghal mai thei lah a ni hek lo. A chinfel dan kawng zawn erawh sorkar mawhphurhna a ni a, a dawih zawka tan a fuh lo a, huaisar bik lutuk pawh a fuh lohna chin a awm mai thei bawk. Chutih rual erawh chuan kan dinna hmun erawh chian a, nghet taka kan din tlang tlat a tul awm e.
Thawhlehni kha ramri buai vanga silaia inkah champha vawikhatna a ni a, Assam lamin nunna hial an chan phah a nih kha. Hemi chungchang kal zelah hian inbiakna pawh vawi duai lo neih a ni tawh a, ramria hmalak rih loh thlengin hmalakna kalpui a lo ni thin tawh bawk.
Mizoram home minister chuan ramri chungchangah Assam lamin inbiak an duh thu rawn sawiin, rawtna siam tura a chhan let thu hriat a ni a, a lo dawnsawn dan tawk hi kan hriat a tul hle dawnin a lang a ni.
Ramri chungchangah hian Dy. CM chairman-na hnuaia din Boundary Committee chuan Mizoram ramri atana BEFR 1875 ramri chu an pawm tih an tarlang tawh a, kan dinhmun leh dinna hi kan hriat thar fo pawh a tul zel dawnin a lang.