North leh South Korea inbiakpawhna (communication hotline), nikum June thlaa Pyongyang-in an lo tihtawp tawh chu an chhunzawm thar leh ta.
South lam president pisa chuan ram pahnih hruaitute chuan inrintawnna tihthat thar leha inkungkaihna tihngheh leh an duh ve ve niin a puang.
Thuchhuah chuan April thla atang khan mi malin lehkha pawh an inthawn tawn fo niin a tar lang bawk.
North Korea hian June, 2020 khan ram pahnih inkawm (summit) neih tur a hlawhchham khan hotline hi an titawp.
Inbiakpawhna an tihtawp hnu lawkah hian inbiakpawhna lam a that theih nana inter-Korean border office pawh an tipuak nghal bawk.
“Hruaitu lawkten inremna an neih angin hmar lam leh chhim lam ramte hian inter-Korean communication liaison line chu July 27 chawhma dar 10:00 atanga tihnun thar leh a ni,” tiin North Korea-a sorkar thupuangtu, KCNA news agency chuan a tar lang.
“Hruaitu lawkte hian inrintawnna tihngheh leha inkungkaihna tha siam leh an duh,” a ti.
South Korea-a unification ministry chuan ram pahnih aiawhte chu minute thum chhung an inbia tih a sawi a. Ministry hian Thawhlehni chawhnuah an inbe leh a, ni tin inbiak kalpui a ni dawn tih a sawi bawk.
“Kum khat chuang hnuah kan inbe leh ta a. Hei hi Korean mipui zawng zawng tan thu lawmawm a nih ka beisei,” tiin South lam aiawh chuan a sawi.